Reykingar og Ólsen Ólsen – í Gamla skóla

GAMLI SKÓLI – 13

• Í þessum mánuði eru 120 ár síðan hið gamla, glæsilega skólahús Menntaskólans á Akureyri var tekið í notkun. Akureyri.net birtir af því tilefni einn kafla á dag út mánuðinn úr bókinni Lifandi húsið - saga gamla skólahúss Menntaskólans á Akureyri.

Um áratuga skeið spiluðu kennarar Ólsen Ólsen í löngufrímínútum á kennarastofunni – hvar sem hana var að finna í Gamla skóla. Myndin er tekin vorið 1980 á kennarastofunni í vesturstofu gömlu skólameistaraíbúðarinnar sem eitt sinn var svefnherbergi skólameistarahjónanna þar sem fæddust þrír drengir. Böðvar Guðmundsson íslenskukennari, Erlingur Sigurðarson íslenskukennari, Sverrir Páll íslenskukennari, Valdimar Gunnarsson íslenskukennari og Gísli Jónsson íslenskukennari sitja hugsandi yfir spilunum og reykja þrír pípu, eins og tíska margra gáfumanna var á síðustu öld. Fyrrum var reykt víða í Gamla skóla: á kennarastofu, í íbúð skólameistara og jafnvel í kennslustofum við vorpróf. Það er einnig í minnum haft, að þegar Brynjólfur Sveinsson íslenskukennari kom frá heimili sínu við Skólastíg til kennslu gekk hann inn um gamla anddyrið, eins og lög gerðu ráð fyrir, og eftir Langagangi inn á kennarastofuna sem þá var næst innan við Gunnbjarnarlínu, næst norðan við skrifstofu skólameistara. Á göngu sinni að heiman reykti hann stóran vindil og gekk reykjandi inn Langagang á kennarastofu og hélt þar áfram að reykja þar til vindillinn var allur.