Óþolandi staða á hjúkrunarheimilum

Hilda Jana Gísladóttir, oddviti Samfylkingarinnar á Akureyri, segir stöðuna á hjúkrunarheimilum bæjarins óþolandi og gagnrýnir meirihlutann í bæjarstjórn harðlega í grein sem birtist á Akureyri.net í dag.

Í vetur var 20 rýmum lokað á hjúkrunarheimilinu Hlíð vegna endurbóta og nú stefnir í frekari lokun, jafnvel 10 rýma til viðbótar segir Hilda Jana, „og útlit fyrir margra mánaða töfum á framkvæmdum með tilheyrandi álagi á allt kerfið. Bent hefur verið á að tafirnar megi rekja til þess að ríkið og Akureyrarbær hafi ekki komið sér saman um kostnaðarskiptingu verkefnisins. Það virðist vera rétt.“

Hún segir ekki liggja fyrir samkomulag um framtíðareignarhald á Hlíð né nýtingu á því húsnæði sveitarfélagsins fyrir öldrunarþjónustu og Akureyrarbær af þeim sökum hafnað því upp á síðkastið að greiða reikninga vegna endurbótanna. „Sú ákvörðun var ekki tekin af okkur sem sitjum í minnihluta bæjarstjórnar og reyndar tekin án okkar vitneskju.“

Hilda segir einnig: „Á meðan allir sem að málinu koma benda hver á annan sem sökudólg í málinu, þá bíða hins vegar aldraðir og aðstandendur þeirra eftir nauðsynlegri þjónustu. Aldraðir bíða ekki bara heima, því að skv. síðustu tölum þá voru um 18% rýma á fullorðinsdeildum Sjúkrahússins á Akureyri, þ.e.a.s. Kristnesspítala, lyflækningadeild og skurðlækningadeild, nýtt af sjúklingum sem hafa engin önnur úrræði til að fara í. Aldraðir eiga skilið að eiga áhyggjulaust ævikvöld. Okkur öllum sem komum að málum ber rík skylda til þess að sjá til þess að svo sé.“

Smellið hér til að lesa grein Hildu Jönu.