Börn úr Síðuskóla glöddu granna sína

Íbúar og starfsfólk í Lögmannshlíð, hjúkrunarheimili Heilsuverndar í Glerárhverfi, fengu ánægjulega heimsókn á föstudagsmorgun þegar um 100 nágrannar þeirra úr Síðuskóla litu þar við. Þar voru á ferð krakkar úr 5., 6. og 7. bekk skólans sem höfðu staðið fyrir kaffisölu á nýliðinni Barnamenningarhátíð. Hagnaður af því viðskiptatækifæri var alls 85.000 krónur og ákváðu börnin að færa fólkinu í Lögmannshlíð þá fjárhæð að gjöf. Ekki nóg með það heldur fylgdi gjöfinni fallegur söngur gestanna þegar ungir sem aldnir komu saman í blíðskaparveðri í garði fyrir utan heimilið. Þau skilaboð bárust akureyri.net að starfsfólk og íbúar Lögmannshlíðar væru himinsæl og afar þakklát fyrir hugulsemina, sönginn og notalega heimsókn frá nágrönnum sínum.