Lausir hundar valda skemmdum á Jaðarsvelli

Undanfarið hafa orðið skemmdir á golfvelli Golfklúbbs Akureyrar að Jaðri, sem rekja má til lausagöngu hunda. Vegna úrkomu upp á síðkastið er völlurinn víða mjög blautur og sérstaklega eru flatirnar viðkvæmar fyrir ágangi.

Hluti af almennu göngustígakerfi Akureyrar liggur gegnum golfvölllinn að Jaðri og öllum er heimil umferð um stígana. Til dæmis er vinsælt að ganga, hlaupa eða hjóla inn í Naustaborgir eftir stíg sem byrjar við undirgöngin undir Miðhúsabraut. Skammt frá þessum undirgöngum liggur 5. brautin á Jaðarsvelli meðfram stígnum og það er einmitt á 5. flötinni sem skemmdir hafa orðið. Svo virðist sem hundur eða hundar hafi hlaupið um á flötinni og skilið eftir sig talsverð ummerki á annars sléttu yfirborði flatarinnar.

Lausaganga hunda er að sjálfsögðu bönnuð á þessum göngustígum, eins og annars staðar í bæjarlandi Akureyrar, og á Facebook-síðu sinni ítrekar klúbburinn við þá sem eiga leið um að virða þetta bann.