Landsátak í sundi í laugunum í nóvember

Landsátak í sundi, sem ber einfaldlega nafnið Syndum, stendur yfir allan nóvembermánuð í sundlaugum landsins. Þeir metrar sem landsmenn synda á meðan landsátakið stendur yfir munu safnast saman og markmiðið er að synda sem flesta hringi kringum Ísland.

Syndum er heilsu- og hvatningarátak sem höfðar til allra landsmanna. Þetta er í fimmta sinn sem þetta landsátak fer fram en það er Íþrótta- og ólympíusamband Íslands sem stendur fyrir átakinu, í samvinnu við Sundsamband Íslands. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess. Í átakinu taka landsmenn sig saman og synda hringi kringum Ísland en í fyrra voru syntir ríflega 32.000 kílómetrar, sem eru næstum 24 hringir kringum landið.

Til að taka þátt þarf að stofna aðgang á vefsíðu átaksins og skrá þar inn vegalengd í hvert sinn sinn sem synt er. Þau sem eiga notendaaðgang úr Lífshlaupinu eða Hjólað í vinnuna geta notað hann fyrir skráningar. Í afgreiðslu Sundlaugar Akureyrar eru líka skráningarblöð þar sem gestir laugarinnar geta skráð sínar sundferðir.