Íshokkí: Alltaf metnaður til að vinna titla

Kvennalið Skautafélags Akureyrar í íshokkí hefur leik á Íslandsmótinu, Toppdeildinni, í dag. SA-konur taka þá á móti liði Skautafélags Reykjavíkur í Skautahöllinni á Akureyri og hefst leikurinn kl. 16:45, en þessi lið unnu hvort sinn titilinn í vor. SA vann deildarmeistaratitilinn, en SR vann einvígið um Íslandsmeistaratitilinn. Áhorfendur geta því væntanlega búist við hörkuviðureign strax í upphafi móts.

Nokkrar breytingar hafa orðið á liði SA eins og gengur og gerist á milli tímabila. Stærstu fréttirnar komu snemmsumars þegar tilkynnt var um heimkomu Sunnu Björgvinsdóttur eftir nokkurra ára dvöl og spilamennsku við góðan orðstír í Svíþjóð. Þá hefur Hilma Bóel Bergsdóttir tekið fram skautana að nýju og kemur aftur heim til SA frá Fjölni, en hún tók sér hlé frá hokkíinu í fyrravetur.

Enn heldur SA áfram að reiða fram ungar og efnilegar hokkíkonur sem eiga erindi og reyna fyrir sér erlendis. Tvær öflugar landsliðskonur sem spiluðu stórt hlutverk í liði SA í fyrravetur, þær Kolbrún Björnsdóttir og Aðalheiður Anna Ragnarsdóttir hafa yfirgefið herbúðir SA og freista gæfunnar á nýjum slóðum. Þá er Amanda Ýr Bjarnadóttir flutt aftur til Danmerkur, en hún spilaði hluta úr síðasta tímabili með SA eftir dvöl í Danmörku.

Erfiðara að komast inn en áður

Lið SA er sem fyrr blanda af eldri og reyndari leikmönnum og svo mörgum ungum og efnilegum stelpum sem berjast um sæti í hópnum og liðinu. Fjölgun iðkenda hjá félaginu og framfarir yngri leikmanna hefur orðið til þess að erfiðara er að komast inn í meistaraflokkshópinn en var áður.

Eftir því sem næst verður komist mun ein af þeim eldri í leikmannahópnum leggja meistaraflokksskautana á hilluna, Eva María Karvelsdóttir, og eflaust verður eitthvað mismunandi af hve miklum krafti og hvenær þær koma á fullu inn í tímabilið núna. Anna Sonja Ágústsdóttir er í pásu vegna anna við búskapinn, en vonandi sést hún aftur á svellinu þegar vetrar.

Bæði liðin í leik dagsins eru með erlendar hokkíkonur í markinu og báðar komnar með reynslu hér á landi. Shawlee Gaudreault er mætt til Akureyrar enn eitt árið og Julianna Thomson verður áfram á milli stanganna hjá Reykjavíkurfélaginu.

Kærkomið tækifæri að ráða sig til SA

Nýr þjálfari er við stjórnvölinn hjá SA, Emil Alengård, og mun stjórna báðum meistaraflokksliðunum, sem og U18 liðum SA. Emil þekkir vel til íslenskra hokkíleikmanna. 

Emil þekkir að sjálfsögðu til starfsins og andans hjá Skautafélagi Akureyrar þó hann hafi alist upp í Svíþjóð. Hann á íslenska móður og sænskan föður og um það leyti sem hann var að banka á dyrnar hjá U18 landsliði Svíþjóðar hafði Viðar Garðarsson, framkvæmdastjóri ÍHÍ, samband við hann með þá hugmynd að leika fyrir Ísland. Sú hugmynd varð að veruleika og á nokkrum mánuðum spilaði Emil með þremur íslenskum landsliðum á Heimsmeistaramótum, U18, U20 og A-landsliðinu.

Emil á einnig að baki reynslu af þjálfun í Svíþjóð þar sem hann var aðstoðarþjálfari karlaliðsins hjá stórliði AIK og þjálfari U18 og U20 liða félagsins. Hann hefur undanfarin sex ár starfað sem yfirþjálfari hjá Fjölni, en það freistaði hans að koma norður enda er sambýliskona hans frá Akureyri og þau höfðu rætt um það að flytja norður. Það var því kærkomið tækifæri þegar þjálfarastaðan hjá SA losnaði í vor.

Einkenni klúbbsins passar við þjálfarann

Emil segir að einkenni félagsins – eða identity – passa vel við það sem hann sjálfur stendur fyrir, það er að leggja hart að sér og vinna mikið til að ná árangri. Hann segir það vera númer eitt. Hann kveðst vilja leggja áherslu á að bæta og þróa spil með pökkinn, en einnig afísæfingar, að hjálpa leikmönnum og leiðbeina, hvað er gott að gera fyrir og eftir æfingar, og þegar það er frí. 

Metnaður innan SA hefur auðvitað alltaf staðið til þess að vinna titla og Emil mun að sjálfsögðu leggja áherslu á að ná árangri með liðum klúbbsins. „Ég veit að SA vill vinna gullið í lok tímabilsins og ég hef ekki þurft að nefna það neitt mikið,“ segir hann í spjalli við tíðindamann frá akureyri.net. Hann veit fullvel að þegar hann er í SA er búist við árangri og titlum. Um kvennalið SA segir hann: „Þetta er stór hópur og leikmenn í hópnum sem sýna mikinn dugnað sem hpkkíleikmenn. Ég vil að hópnum líði vel, vera með góðar æfingar og hafa gaman. En ég veit þegar ég er hjá SA þá er búist við árangri. Ég vil líka leggja áherslu á að leikmenn bæti sig. Hvern einasta dag erum við að æfa til að bæta okkur og það er alltaf eitthvað sem við getum bætt,“ segir Emil og segir metnað leikmanna og félagsins vera mikinn.

Elísabet Inga Ásgrímsdóttir, formaður íshokkídeildar SA, er með tíðindamanni og Emil í spjallinu og tekur undir með Emil að það sé metnaður hjá leikmönnum og félaginu. Mér finnst leikmenn koma brattir inn og ákafir í tímabilið. Það er líka afmælisár hjá félaginu, sem er að verða 90 ára. Mér finnst fólk bæði karla- og kvennamegin heilt yfir er spennt fyrir tímabilinu, nýir þjálfarar og fólk kemur af ákafa inn í þetta. Og ætla sér að vinna. Það er tónninn,“ segir Elísabet enda hefur það aldrei verið öðruvísi hjá SA, ætlunin er alltaf að vinna.

Emil segir eldri leikmenn með reynslu og leikskilning vera mikilvægan hluta liðsins. Þær yngri hafi grunnskilning á leiknum og hann vilji vinna með framfarir og þróun leikmanna, bæta leikskilning og tækni, vinna með þeim sem íþróttakonum, á ísnum og utan hans. Vinna með það hvert liðið vill stefna. 

Einkenni SA-liða sem Emil vill vinna með er að vilja vinna pökkinn hratt aftur þegar hann tapast, vinna saman í pressu, og stjórna leiknum með pökkinn. 

Meistaraflokkur SA

• Markverðir
  Aníta Ósk Sævarsdóttir
  Marey Viðja Sigurðardóttir
  Shawlee Gaudreault
• Varnarmenn
  Arndís Eggerz Sigurðardóttir
  Aþena Elínrós Guðlaugsdóttir
  Freyja Rán Sigurjónsdóttir
  Jónína Guðbjartsdóttir
  Magdaléna Šulová
  Sveindís Marý Sveinsdóttir
  Sylvía Mörk Kristinsdóttir
• Sóknarmenn
  Aníta Júlíana Benjamínsdóttir
  Arna Sigríður Gunnlaugsdóttir
  Berglind Huld Ríkarðsdóttir
  Bergþóra H Bergþórsdóttir
  Eyrún Arna Garðarsdóttir
  Guðrún Ásta Valentine
  Heiðrún Helga Rúnarsdóttir
  Herborg Rut Geirsdóttir
  Hilma Bóel Bergsdóttir
  Kolbrún María Garðarsdóttir
  Lara Mist Jóhannsdóttir
  Ragnheiður Alís Ragnarsdóttir
  Silvía Rán Björgvinsdóttir
  Sólrún Assa Arnardóttir
  Sunna Björgvinsdóttir
  
  
• Komnar
  Aþena Elínrós Guðlaugsdóttir – úr U16 liði félagsins
  Sunna Björgvinsdóttir – frá Södertälje, Sviþjóð
  Hilma Bóel Bergsdóttir – frá Fjölnir
• Farnar
  Aåalheiåur Anna Ragnarsdóttir – til Sundsvall, Sviþjóð
  Anna Sonja Ágústsdóttir – í pásu
  Eva María Karvelsdóttir – hætt
  Amanda Ýr Bjarnadóttir – flutt til Danmerkur
  Kolbrún Björnsdóttir – til CP Sharks Mechelen, Belgíu