Fótbolti og íshokkí heima - handbolti syðra

Fótbolti, handbolti og íshokkí á dagskránni í dag. Nú dregur til tíðinda í 5. deild karla í fótboltanum, seinni undanúrslitaviðureignirnar og þar eru Hamrarnir í góðri stöðu, eiga heimaleik eftir jafntefli á útivelli í fyrri viðureigninni. Þórsarar hefja leik í Olísdeild karla í handbolta og SA konur spila sinn fyrsta leik í Toppdeildinni í íshokkí síðdegis.

Íþróttadeild akureyri.net hefur ekki fjallað sérstaklega um keppni í 5. deild karla í knattspyrnu, en þar eiga Akureyringar reyndar fulltrúa engu að síður. Lið Hamranna er þar á góðri leið með að vinna sig upp um deild. Liðunum í 5. deild var skipt í tvo riðla og tvö efstu lið hvors riðils komast áfram í undanúrslit. Hamrarnir unnu sinn riðil og mættu Smára, sem endaði í 2. sæti hins riðilsins, í fyrri undanúrslitaviðureign um liðna helgi í Kópavogi. Niðurstaðan varð jafntefli, 2-2. Seinni leikur liðanna fer fram á Akureyri í dag. Sigurliðið úr þessum tveimur viðureignum mætir annaðhvort Skallagrími eða Stokkseyri í úrslitaleik um deildarmeistaratitil 5. deildar, en bæði lið úrslitaleiksins fara upp í 4. deild.

• Fótbolti
  5. deild karla, undanúrslit, seinni leikur
  Greifavöllurinn á Akureyri (KA-völlur) kl. 15
  Hamrarnir - Smári
  

Handboltinn er kominn í gang, fyrstu leikir Olísdeildarinnar hafa nú þegar farið fram og í dag hefur lið Þórs leik með heimsókn í Úlfarsárdalinn. Veturinn fram undan, breytingar hjá Akureyrarliðunum og spár um niðurstöður voru til umfjöllunar á akureyri.net fyrr í vikunni, og í dag verður einnig fjallað ítarlegar um Þórsliðið og breytingar í herbúðum þeirra.

• Handbolti
  Olísdeild karla, 1. umferð
  Lambhagahöllin í Úlfarsárdal kl. 16
  Fram - Þór
  

Íshokkífólk er komið af stað og stutt í að keppni á Íslansdmótunum í meistaraflokkunum, Toppdeildunum, hefjist. Konurnar byrja í Skautahöllinni á Akureyri í dag og mætast þá liðin sem börðust um Íslandsmeistaratitilinn í vor, SA og SR. Nánar er fjallað um upphaf íshokkítímabilsins hjá kvennaliði SA í sér grein hér á akureyri.net.

• Íshokkí
  Toppdeild kvenna
  Skautahöllin á Akureyri kl. 16:45
  SA - SR