Umræðan

HM U18 kvenna í íshokkí á Akureyri 2027

Haraldur Ingólfsson skrifar 29. maí 2026 | kl. 09:20

Akureyringarnir í U18 landsliðshópi kvenna 2026. Aftari röð frá vinstri: Silvía Rán Björgvinsdóttir aðstoðarþjálfari, Eyrún Arna Garðarsdóttir, Heiðrún Helga Rúnarsdóttir, Magdalena Sulova, Marey Viðja Sigurðardóttir. Fremri röð frá vinstri: Freyja Rán Sigurjónsdóttir, Sylvía Mörk Kristinsdóttir, Kolbrún Björnsdóttir, Ragnheiður Alís Ragnarsdóttir, Sólrún Assa Arnardóttir og Aníta Júlíana Benjamínsdóttir.

A-landslið karla og kvenna, ásamt yngri landsliðunum, U20 og U18 karla og U18 kvenna, taka árlega þátt í Heimsmeistaramótum í íshokkí, þar sem spilað er eftir deildafyrirkomulagi. Staðsetningar mótanna á næsta ári voru ákveðnar í dag á þingi Alþjóða íshokkísambandsins, IIHF, sem haldið er þessa dagana í Zürich í Sviss. Eitt mótanna verður haldið á Akureyri í janúar 2027.

Fyrir utan U18 landslið kvenna verða landsliðin á faraldsfæti á Heimsmeistaramótin á komandi ári.

A-landslið karla: Bisek í Kyrgistan, 28. mars - 3. apríl 2027
A-landslið kvenna: Electranai í Litháen, 8.-14. nóvember 2027
U20 karla: Istanbúl í Tyrklandi, 18.-24. janúar 2027
U18 karla: Óákveðið, ákvörðun tekin í september
U18 kvenna: Skautahöllin á Akureyri, 11.-17. janúar 2027

Ákveðnar breytingar verða gerðar á mótafyrirkomulaginu. A-landsliðin hafa að jafnaði spilað í sínum mótum í aprílmánuði, en eins og sjá má færist mót kvennalandsliðsins til nóvembermánaðar.

Til baka í umræðuna