Arna Sif Ásgrímsdóttir komin heim í Þór/KA

Knattspyrnukonan Arna Sif Ásgrímsdóttir er komin til Þórs/KA á ný eftir fjögurra ára dvöl hjá Val í Reykjavík. Samningur hennar við Þór/KA gildir til tveggja ára. Greint er frá félagaskiptunum á vef Þórs/KA.

Arna Sif er 33 ára, fædd 1992. Hún hóf glæsilegan knattspyrnuferil í yngri flokkum Þórs og kom kornung inn í meistaraflokk Þórs/KA; kom í fyrsta skipti við sögu í meistaraflokksleik 14 ára, í maí árið 2007. „Samtals á hún að baki 12 keppnistímabil með Þór/KA, 2007-2014 og 2018-2021. Hún verður því reyndasti leikmaður félagsins á komandi keppnistímabili,“  segir á vef Þórs/KA í dag.

• Myndasyrpa af marki Örnu Sifjar gegn Breiðabliki

Arna Sif var fyrirliði og lykilleikmaður í liði Þórs/KA sem varð Íslandsmeistari 2012. Hún var kjörin íþróttakona Akureyrar 2012 og hefur sem leikmaður Þórs/KA verið kjörin íþróttakona Þórs alls fimm sinnum, árin 2012, 2014, 2018, 2019 og 2021. Hún hefur einnig leikið í Skotlandi, á Ítalíu og síðustu fjögur tímabil var hún á mála hjá Val sem fyrr segir. Þar varð Arna Sif bikarmeistari 2022 og Íslandsmeistari 2023, en það ár var hún einnig kjörin íþróttamaður Vals.

Á vef Þórs/KA er eftirfarandi tölfræði um Örnu Sif birt:

• 425 meistaraflokksleikir, þar af 401 leikur og 74 mörk í KSÍ-mótum og Evrópukeppni
• Af þessum leikjum eru 290 fyrir Þór/KA
• Arna Sif spilaði 19 leiki í efstu deild Svíþjóðar 2015
• Hún spilaði fimm leiki í efstu deild á Ítalíu 2017
• Leikirnir í efstu deild hér á landi eru orðnir 272, mörkin 47, þar af 197 leikir fyrir Þór/KA
• Arna Sif á að baki 19 landsleiki og eitt landsliðsmark, auk 59 leikja með yngri landsliðum Íslands

• Fréttin á vef Þórs/KA: Arna Sif Ásgrímsdóttir gengur til liðs við Þór/KA