Blak: KA-liðin í 2. sæti deildarinnar

Keppni í efstu deildum karla og kvenna í blaki, Unbroken-deildinni, lauk um helgina. HK varð deildarmeistari kvennamegin og Hamar hjá körlunum. Lið KA urðu í öðru sæti og í úrslitakeppninni sem er framundan mæta þau liðunum sem enduðu í 3. sæti. Kvennaliðið mætir Völsungi og karlarnir Aftureldingu en úrslitakeppnin hefst í apríl.

Kvennaliðið átti ennþá möguleika á að verja deildarmeistaratitilinn en liðið lék tvívegis gegn HK syðra um helgina. Svo fór að HK vann báða leikina, 3:2 í hörkuleik á laugardeginum og 3:1 á sunnudag. HK mætir Aftureldingu í úrslitakeppninni og KA glímir við Völsung. Sigurvegarar úr þessum viðureignum leika síðan um Íslandsmeistaratitilinn.

Í Unbroken-deild karla hafði Hamar þegar tryggt sér deildarmeistaratitilinn fyrir leiki helgarinnar. KA gerði það sem þurfti til að tryggja 2. sætið með tveimur sigrum gegn HK í Kópavogi. Báðir leikir unnust 3:1 og KA mætir Aftureldingu í undanúrslitunum. Hamar leikur gegn Þrótti úr Reykjavík og sigurvegar þessara viðureigna leika svo um Íslandsmeistaratitilinn.

Lokastaðan í Unbroken-deild kvenna

Lokastaðan í Unbroken-deild karla