Stórsigur gegn KV og Þór áfram í 2. sætinu

Kvennalið Þórs í körfuknattleik er áfram í 2. sæti 1. deildarinnar eftir stórsigur á liði KV á útivelli í gær, 115-72. 

Það varð snemma ljóst í hvað stefndi. Þórsliðið skoraði fyrstu 24 stig leiksins og fyrsti leikhluti meira en hálfnaður áður en heimakonur minnkuðu muninn í 3-24. Munurinn 18 stig eftir fyrsta leikhlutann og 41 stig eftir fyrri hálfleikinn. Seinni hálfleikurinn var jafnari, en munurinn að lokum 43 stig. Tvær í Þórsliðinu, Chloe Wilson og Yvette Adriaans, náðu tvöfaldri tvennu, það er tveggja stafa tölu í tveimur tölfræðiþáttum leiksins. 

KV - Þór (12-30) (14-37) 26-67 (20-25) (26-23) 72-115

Chloe Wilson var eins og oftast áður stigahæst í Þórsliðinu, skoraði 31 stig og tók að auki 13 fráköst. Emilie Ravn skoraði 24 stig. Yvette Adriaans skoraði 13 stig og tók 11 fráköst. 

Helstu tölur leikmanna Þórs, stig/fráköst/stoðsendingar:

• Chloe Wilson 31/13/3 - 42 framlagspunktar 
• Emilie Ravn 24/5/4
• Emma Karólína Snæbjarnardóttir 17/8/5
• Karen Lind Helgadóttir 15/5/0
• Yvette Adriaans 13/11/5
• Sigurlaug Eva Jónasdóttir 9/2/3
• Hjörtfríður Óðinsdóttir 6/0/0
• María Sól Helgadóttir 0/4/4

Tölfræði leiksins

Staðan í deildinni

Aþena er í efsta sæti deildarinnar, en efsta liðið fer beint upp um deild. Aþena hefur unnið 15 leiki og tapað einum. Þór hefur leikið einum leik færra, er með 13 sigra og tvö töp, en næst er Fjölnir með 13 sigra og þrjú töp.

Leikirnir sem toppliðin eiga efitir:

• Aþena: Stjarnan b (h), Njarðvík b (h)
• Þór: Vestri (h), Selfoss (ú), Snæfell (h)
• Fjölnir: Snæfell (h), Stjarnan b (ú)