„Algjör hola í höggi“

Akureyrarbær hefur auglýst eftir kauptilboðum í byggingarrétt hótels við Jaðarsvöll. 

Lóðin sem um ræðir er 3.000 fermetrar og er auglýst sem einstök staðsetning „við einn besta golfvöll landsins og útivistarsvæði bæjarins í Naustaborgum og Kjarnaskógi sem bjóða upp á spennandi möguleika árið um kring. Má segja að þetta hótel verði algjör hola í höggi,“ eins og það er orðað í auglýsingunni. Tilboðsfrestur er til hádegis miðvikudaginn 13. mars og verða tilboðin opnuð í Ráðhúsinu kl. 14 sama dag. 

Byggingarreitur fyrir hótel suðaustan við núverandi klúbbhús við Jaðarsvöll hefur verið afmarkaður í deiliskipulagi frá árinu 2011. Skriður komst á málið með samningi bæjarins við Golfklúbb Akureyrar í september í fyrra eins og Akureyri.net greindi frá í frétt þegar undirritaður var samningur milli Akureyrarbæjar og Golfklúbbsins um uppbyggingu á svæði klúbbsins.