Svekkjandi tap og Þórsarar úr leik

Þór tapaði 2:0 í gær fyrir FK Zalgiris í Litháen, í seinni leik félaganna í fyrstu umferð forkeppni Evrópudeildar ungmenna í knattspyrnu – UEFA Youth League. Litháarnir unnu fyrri leikinn 4:3 á VÍS-velli Þórs og viðureignina því samanlegt 6:3. 

Arnar Geir Halldórsson, yfirþjálfari Þórs segir svekkjandi að hafa tapað leiknum. Litháarnir hafi skorað ódýrt mark undir lok fyrri hálfleiks, Þórsarar sótt mikið án þess að ná að skapa mörg færi „og svo skora þeir skyndisóknamark þegar við vorum komnir með marga fram seint í leiknum. Það er svekkjandi að ná ekki nýta góðar stöður sem við fengum til að skora,“ sagði Arnar Geir. 

Framherjinn Vakaris Berenta, sem gerði þrennu í fyrri leiknum, skoraði í blálok fyrri hálfleiksins og Daumantas Braskys gerði seinna mark Zalgiris þegar rúmar 10 mínútur voru eftir.

Tveir af máttarstólpum Þórsliðsins voru fjarri góðu gamni í gær. Ásbjörn Líndal Arnarsson, sem lék gríðarlega vel í vörninni í fyrri leiknum, og Sverrir Páll Ingason sem lagði þá upp eitt markanna, fóru ekki með utan. Báðir voru í byrjunarliði Þórs gegn ÍBV í Bestu deildinni um síðustu helgi og framundan er annar gríðarlega mikilvægur leikur í baráttunni um að halda sæti í deildinni, gegn Stjörnunni á laugardaginn þar sem þeir verða án efa eldlínunni.

• Leikskýrslan og tölfræði á vef UEFA

FK Zalgiris mætir St. Patrick's Athletic frá Írlandi í næstu umferð.