Stefnt á leiki bæði í Liverpool og Leeds

Ferðaskrifstofan TA Sport og Akureyri.net ætla að bjóða upp á þrjár hópferðir á knattspyrnuleiki í Englandi í vetur, í beinu flugi með easyJet frá Akureyri. Tvær ferðir eru á prjónunum á heimaleiki Liverpool og sú þriðja á heimaleik nýliða Leeds, gegn Liverpool.

Tveir hópar fóru utan í fyrravetur og sáu Liverpool leika á heimavelli, frábærlega tókst til í bæði skiptin og því verður leikurinn endurtekinn. Beint flug easyJet milli Akureyrar og Manchester hefst á ný laugardaginn 15. nóvember og stefnt er að fyrstu ferðinni viku síðar.

Forskráning

Enn eru allir leikir sem fara fram um helgar skráðir á laugardag, nema þeir allra fyrstu í haust, og ekki kemur í ljós fyrr en með um það bil sex vikna fyrirvara hvaða leikir verða færðir á sunnudag eða mánudag, að ósk sjónvarpsstöðva.

Flug easyJet frá Akureyri er ekki nógu snemma dags til þess að hægt sé að ná leik á laugardegi og því enn ekki hægt að fullyrða hvaða leikir verða í boði en einblínt er á þrjár helgar til að byrja með.

Mögulegt er að forskrá sig, án allra skuldbindinga, og þeir sem það gera ganga fyrir þegar sala ferðanna hefst. Gífurlegur áhugi var á ferðunum síðasta vetur þannig að áhugasamir eru hvattir til þess að skrá sig.

• Til að forskrá sig skal senda póst, með upplýsingum um nafn/nöfn og símanúmer á info@tasport.is eða skapti@akureyri.net

Í fyrravetur reyndist langmestur áhugi á að sjá Liverpool á heimavelli og stefnt er á eftirtaldar helgar, svo fremi þessir heimaleikir Liverpool og Leeds verði færðir af laugardegi. Einnig er hægt að útvega miða á hina leikina.

22. – 25. nóvember

• Liverpool – Nottingham Forest
• Manchester Utd – Everton
• Leeds – Aston Villa

6. - 9. desember

• Leeds - Liverpool
• Everton - Nottingham Forest

7. – 10. febrúar

• Liverpool – Manchester City
• Manchester Utd – Tottenham
• Leeds – Nottingham Forest

Flogið er út á laugardegi og heim aftur í bítíð á þriðjudegi. Ekki er endanlega ljóst hvað ferðirnar kosta en innifalið verður flug, gisting með morgunmat á góðu hóteli í miðborg Liverpool, rútuferðir til og frá flugvelli, miði á leikinn, matur á vellinum og íslensk fararstjórn.