Pistlar

KA-menn í Eyjum í dag – Dikhaminjia úr leik

Skapti Hallgrímsson skrifar 25. mars 2026 | kl. 06:00

Giorgi Dikhaminjia í skotstöðu í síðasta deildarleik vetarins, gegn Þór í Höllinni á dögunum. Hann er meiddur og missir af leikjum KA í úrslitakeppninni. Mynd: Skapti Hallgrímsson

Úrslitakeppnin í Olísdeild karla í handbolta hefst í dag með tveimur leikjum, annars vegar mætast ÍBV og KA í Vestmanneyjum, hins vegar Valur og HK að Hlíðarenda.

Lykilmenn KA hafa verið frá vegna meiðsla undanfarið, stórskyttan Bjarni Ófeigur Valdimarsson vegna meiðsla á fingri, Norðmaðurinn Morten Linder fór úr axlarlið og fyrirliðinn og varnarjaxlinn Daði Jónsson sleit hásin á æfingu daginn fyrir leikinn við Þór í lokaumferð deildarkeppninnar. Nú er enn einn úr leik; örvhenti hornamaðurinn, Giorgi Dikhaminjia.

Giorgi, næst markahæstur leikmaður KA í vetur á eftir Bjarna Ófeigi, meiddist í landsleik með Georgíu í síðustu viku gegn Ísrael í undankeppni heimsmeistaramótsins. Þetta kom fram á handboltavefnum Handkastinu, þar sem haft er eftir Andra Snæ Stefánssyni þjálfara KA að það væri nokkuð ljóst að tímabilinu væri lokið hjá Georgíumanninum.

ÍBV endaði í 4. sæti deildarinngar og KA í því fimmta. Það er því ÍBV sem á oddaleiksréttinn í þessari viðureign, vinna þarf tvo leiki til að fara áfram í undanúrslit Íslandsmótsins og liðin mætast aftur á sunnudaginn í KA-heimilinu.

Olísdeild karla í handbolta
Átta liða úrslit, leikur 1
Íþróttamiðstöðin í Vestmannaeyjum kl. 18
ÍBV - KA
Útsending: Handboltapassinn í Sjónvarpi Símans
Áskriftarsjónvarp

Leikir þessara liða í deildinni í vetur enduðu með eins og tveggja marka sigri. ÍBV vann 36-34 í Eyjum í október og KA vann 29-28 á Akureyri í febrúar.

Tveir seinni leikirnir í fyrstu umferð úrslitakeppninnar eru á dagskrá á morgun: Haukar - Afturelding og FH - Fram.

Bjarni Ófeigur bestur og Giorgi í úrvalsliðinu

Bjarni Ófeigur Valdimarsson var besti leikmaður Olísdeildarinnar í vetur að mati sérfræðinga Handboltahallarinnar, handboltaþáttarins í sjónvarpi Símans. Þetta var tilkynnt í uppgjörsþætti hallarinnar. Bjarni er vitaskuld í úrvalsliði deildarinnar og Giorgi Dikhaminjia, örvhenti hornamaðurinn sem nefndur var að ofan, er einnig í úrvalsliðinu.

Úrvalslið sérfræðinganna er þannig skipað:

Markvörður: Björgvin Páll Gústavsson, Val
Vinstri hornamaður: Giorgi Dikhaminjia, KA
Skytta hægra megin: Arnór Snær Óskarsson, Val
Leikstjórnandi: Freyr Aronsson, Haukum
Skytta vinstra megin: Bjarni Ófeigur Valdimarsson, KA
Hægri hornamaður: Hannes Höskuldsson, Selfossi
Línumaður: Sigurður Jefferson, HK
Þjálfari ársins: Sigursteinn Arndal, FH
Besti varnarmaðurinn: Ingvar Dagur Gunnarsson, FH

KA-menn fagna sigri á Vestmannaeyingum á heimavelli í síðasta mánuði. Liðin mætast í fyrstu umferð úrslitakeppninnar í Eyjum í dag. Mynd: Skapti Hallgrímsson.

Til baka í yfirlit pistla