Pistlar

Tvístígandi

Jóhann Árelíuz skrifar 07. september 2025 | kl. 06:00

EYRARPÚKINN - 55

Vinstri löppina langaði í Vopnafjörð en þá hægri dreymdi þrennur gegn Þór á Moldarvelli og stóð þar hnífurinn í kúnni.

Svo rammt kvað að ást foreldra minna á Vopnafirði að ég hafði það á tilfinningunni í uppvextinum að ég væri að austan. Kunni bara tvö bæjarnöfn í Eyjafirði, prestssetrin Laufás og Grund.

Taldi ekki Hólkot Steindórs Jónssonar til Eyjafjarðar en ekki má gleyma Hjarðarhaga Freyvangsmegin dalsins því þangað fórum við stundum í heimsókn og skein sól þá sunnudagseftirmiðdaga þegar við dóluðum yfir Eyjafjarðarbrýrnar.

Strekkingur út Hlíðina á leið í Hörgárdalinn og brást ekki þegar beygt var að Hörgárbrúnni að bílslysið þegar bresku hermennirnir létu lífið í jeppa sínum væri rifjað upp.

Garrann lægði svo lítillega á Möðruvallamelum en strengur fram dalinn hjá Auðbrekku Stefáns Valgeirssonar en Stefán var björtust von í brjósti framsóknar í hreppnum og barst oft í tal þessi misserin.

Var hossast í bílakosti á borð við rauða Skódann hans Kalla frænda á Reykjalundi, heiðbláan Fóksvagn Þormóðs að ógleymdum svörtum Ford júníor Björns Kristinssonar A 87.

Jóhann Árelíuz er rithöfundur og skáld.