Geðheilsuefling Andrésar andar

Metþátttaka var á nýafstöðnum Andrésar andar leikum sem voru þeir 50. í röðinni. Akureyri.net sagði frá þessum merku tímamótum og að þrír úr fyrstu Andrésar andar nefndinni sem eru á lífi hafi verið heiðraðir á setningarathöfninni, þeir Hermann Sigtryggsson, Ívar Sigmundsson og Gísli Kristinn Lórenzson. Með þeim í fyrstu nefndinni voru einnig Leifur Tómasson og Kristinn Steinsson.

 

Það var gaman að sjá myndir af þessum gömlu kempum sem voru hugmyndasmiðirnir og hófu þetta merkilega æskulýðsstarf og voru áberandi í bæjarlífinu á Akureyri fyrir hálfri öld og allir krakkar sem stunduðum Fjallið þekktu.

 

Viðurkenning þeirra er virkilega verðskulduð og allir skilja í dag gildi útivistar og hreyfingar. En sennilega eru áhrif á lýðheilsu, forvarnir og geðheilsuefling þessa verkefnis vanmetin. Fjölmargar rannsóknir sýna að það styrkir einbeitingu, úthald, lausnamiðun og markmiðssetningu að undirbúa sig fyrir keppni. Það er veruleg forvörn gegn sjúklegu þunglyndi og fleiri geðsjúkdómum að hreyfa sig reglulega og útivistin léttir líka geð. Fátt er mikilvægara fyrir andlegan þroska og þróun persónugerðar, á einmitt þessu aldurstímabili sem þátttakendur eru á, en góð samvera með félögum, foreldrum og systkinum. Og að fá hvatninguna og hvílast á milli atriða í þessum félagsskap gefur líka tækifæri til að læra betur á álagsvarnir og endurhleðslu.

 

Hermann, Ívar og Gísli. Kærar þakkir fyrir áhrifaríkt og dýrmætt framtak ykkar til geðheilsu íslenskra ungmenna og fyrir að vera svo góðar fyrirmyndir.