Tveir nemendur VMA urðu Íslandsmeistarar

Íslandsmótið í iðn- og verkgreinum fór fram í Laugardalshöllinni um nýliðna helgi. Nemendur VMA gerðu góða ferð suður og Óliver Pálmi Ingvarsson sigraði í rafvirkjun og Sindri Skúlason sigraði í rafeindavirkjun. Alls fóru átta nemendur fyrir hönd VMA í keppnina, en í flokki rafeindavirkjunar átti VMA líka silfrið, þar sem Jóhann Ernir Franklín varð í öðru sæti.

Droplaug Dagbjartsdóttir keppti í rafvirkjun og fékk sérstaka viðurkenningu fyrir að bestu frammistöðu í forritunarhluta keppninnar. Keppendur VMA í málmsuðu voru í harðri baráttu um toppsætin, en Jón Steinar Árnason varð þriðji og Steindór Óli Tobiasson hlaut fjórða sætið. Sigursteinn Arngrímsson keppti í húsasmíði og var hársbreidd frá því að ná þriðja sætinu, segir í frétt á heimasíðu VMA um keppnina.