Tvær af þotunum átta farnar til Keflavíkur

Flugvélar geta nú lent á Keflavíkurflugvelli á ný en eins og fram kom fyrr í dag þurftu margar þotur frá að hverfa þegar veður versnaði snögglega. Alls lentu átta þotur Icelandair á Akureyrarflugvelli síðdegis en á sjötta tímanum voru þær farnar að búa sig til brottfarar, en reyndar eru aðeins tvær farnar.

Fimm vélar Icelandair lentu á Reykjavíkurflugvelli vegna veðursins og átta á Akureyri. Þá fóru tvær vélar til Egilsstaða, önnur þeirra frá Icelandair. Aðstæðurnar höfðu einnig áhrif á vélar ýmissa annarra flugfélaga.

Varaflugvellir mikilvægir

Eins og fram kom í frétt akureyri.net fyrr í dag undirstrikaði Guðni Sigurðsson, upplýsingafulltrúi Icelandair, mikilvægi varaflugvalla landsins þegar svona aðstæður skapast. Veðrið í Keflavík versnaði mjög snögglega og t.a.m. fór hitastigið úr fimm gráðu hita niður í eins stigs frost á aðeins 40 mínútum, samhliða snjókomu og vindhviðum, með þeim afleiðingum að ekki var hægt að lenda.

• Frétt akureyri.net fyrr í dag: Átta Icelandair þotur á Akureyrarflugvelli