Þór/KA tekur á móti Þrótti – frítt á völlinn

Þór/KA tekur á móti Þrótti í dag í Bestu deildinni í knattspyrnu, efstu deild Íslandsmótsins. Stelpurnar okkar eru í harðri botnbaráttu þegar fimm umferðir eru eftir af mótinu. Stjórn Þórs/KA hefur ákveðið, vegna styrks frá ónefndum styrktaraðila, að bjóða frítt á þá þrjá heimaleiki sem liðið á eftir í deildinni.

• Haraldur Ingólfsson, liðsstjóri Þórs/KA, birti í gær ákall til Akureyringa um að styðja við bakið á stelpunum og er ástæða til þess að taka undir orð hans: Ákall til Akureyringa um að styðja stelpurnar

Þór/KA er í þriðja neðsta sæti þegar 13 leikjum er lokið; Keflavík er með 13 stig, Þór/KA hefur 10 stig, Afturelding níu og KR er neðst með sjö stig. Tvö lið falla úr deildinni.

Þróttarar eru í þriðja sæti með 25 stig, aðeins þremur á eftir Breiðabliki sem er í öðru sæti en Valur er efstur með 32 stig og því í kjörstöðu í baráttunni um Íslandsmeistaratitilinn.

Leikurinn á Þórsvellinum (SaltPay vellinum) hefst klukkan 18.00

Að lokinni viðureign kvöldsins á lið Þórs/KA fjóra leiki eftir í Bestu deildinni:

• Miðvikudag 14. september Þór/KA – ÍBV
• Sunnudag 18. september Keflavík – Þór/KA
• Sunnudag 25. september Þór/KA – Stjarnan
• Laugardag 1. október KR – Þór/KA