Þór/KA – Komnar og farnar fyrir tímabilið

Nokkrar breytingar hafa orðið á leikmannahópi knattspyrnuliðs Þórs/KA fyrir átökin í efstu deild kvenna, Bestu deildinni, í sumar. Þar munar auðvitað mest um Söndru Maríu Jessen, sem gekk til liðs við Köln í Þýskalandi síðasta sumar. Eftir síðasta tímabil gengu þær Sonja Björg Sigurðardóttir og Kimberley Dóra Hjálmarsdóttir til liðs við Val en þær voru búnar að festa sig í sessi sem máttarstólpar hjá Þór/KA. Þá verða þær Ellie Moreno og Jessica Berlin ekki áfram með liðinu.

Í stað Ellie og Jessicu hefur Þór/KA samið við þær Erin Flurey og Allie Augur en stærstu tíðindin hljóta þó að vera „heimkoma“ Örnu Sifjar Ásgrímsdóttur. Þá hefur liðið einnig fengið þrjá leikmenn frá Tindastóli og einn frá Völsungi.

Ein skipti eru þó enn ónefnd en liðið mætir nú til leiks með nýjan þjálfara. Jóhann Kristinn Gunnarsson, sem þjálfað hefur liðið undanfarin ár, er tekinn við Þrótti og í stað hans samdi Þór/KA við Aðalstein Jóhann Friðriksson. Aðalsteinn hefur þjálfað Völsung á Húsavík undanfarin ár, bæði karla- og kvennalið, og náð eftirtektarverðum árangri.

Ekki hefur verið lokað fyrir félagaskipti ennþá, þannig að liðin geta gert fleiri breytingar á leikmannahópum sínum.

Vefsíðan fotbolti.net hefur tekið saman heildarlista yfir leikmenn sem hafa komið og farið frá liðunum í deildinni frá síðasta tímabili:

KOMNAR Í ÞÓR/KA

Arna Sif Ásgrímsdóttir frá Val
Halla Bríet Kristjánsdóttir frá Völsungi
Elísa Bríet Björnsdóttir frá Tindastóli
Birgitta Rún Finnbogadóttir frá Tindastóli
María Dögg Jóhannesdóttir frá Tindastóli
Erin Flurey frá Bandaríkjunum
Allie Augur frá Bandaríkjunum

FARNAR FRÁ ÞÓR/KA

Sandra María Jessen til Köln
Sonja Björg Sigurðardóttir í Val
Kimberley Dóra Hjálmarsdóttir í Val
Ellie Moreno
Jessica Berlin
Henríetta Ágústsdóttir í HK (var á láni frá Stjörnunni)
Eva Rut Ásþórsdóttir í Fylki
Krista Dís Kristinsdóttir í Fram