Liði Þórs/KA spáð 7. sæti í Bestu deildinni

Fyrirliðar, þjálfarar og forráðamenn liðanna í efstu deild kvenna í knattspyrnu, Bestu deildinni, spá Þór/KA 7. sæti í deildinni, líkt og í fyrra. Keppni í deildinni hefst í kvöld með tveimur leikjum en Þór/KA tekur á móti FH í 1. umferðinni á nýja gervigrasvellinum á Þórssvæðinu á morgun, laugardag, kl. 16.

Hin árlega spá var opinberuð á kynningarfundi deildarinnar á dögunum og samkvæmt henni mun Breiðablik verja Íslandsmeistaratitil sinn en fram og Grindavík/Njarðvík er spáð falli úr deildinni.

Aðalsteinn Jóhann Friðriksson, þjálfari Þórs/KA, taldi í samtali við RUV eftir að spáin var gerð opinber að líklega væri hún byggð á tímabilinu í fyrra. „Spá er bara spá og við ætlum að sjálfsögðu að afsanna það. Við ætlum ekki að vera í 7. sæti,“ segir Aðalsteinn í viðtalinu. Hann fór yfir leikmannabreytingar frá síðasta tímabili og segir að þeim finnist hópurinn vera sterkari og breiðari núna. „Við erum að reyna að breyta um leikstíl. Okkur langar að skora mörk og það er draumur hjá mér að vera með lið sem getur skorað mörk,“ segir Aðalsteinn og bætir við að umfram allt eigi að vera gaman og ætlunin sé að skemmta áhorfendum með því að skora eitthvað af mörkum, þó að auðvitað sé líka mikilvægt að verjast vel.

Samkvæmt áðurnefndri spá verður þetta lokastaðan í efstu deild kvenna í knattspyrnu, Bestu deildinni, árið 2026:

1. Breiðablik
2. FH
3. Þróttur R.
4. Víkingur R.
5. Stjarnan
6. Valur
7. Þór/KA
8. ÍBV
9. Fram
10. Grindavík/Njarðvík