Slippurinn DNG hannar lestarkerfi í nýtt skip

Slippurinn DNG á Akureyri mun hanna sjálfvirkt flutningskerfi í lest nýs togskips Vinnslustöðvarinnar í Vestmannaeyjum. Samningur þar að lútandi var undirritaður á sjávarútvegssýningunni í Barcelona í síðustu viku. 

„Samningurinn felst í því að Skipasýn, sem fer með hönnun 29 metra togskips fyrir Vinnslustöðina, hannar lest skipsins á þann hátt að hægt sé að koma fyrir 250-280 kera sjálfvirku flutningskerfi frá DNG by Slippurinn. Þar að auki er hannaður vinnslubúnaður með bestu mögulegu hráefnismeðferð að leiðarljósi,“ segir í tilkynningu frá Slippnum DNG.

„Samstarfið við Vinnslustöðina í Vestmanneyjum og Skipasýn hefur verið mjög gott og það er sérstaklega ánægjulegt fyrir okkur að koma að verkefninu svona á fyrstu stigum hönnunar. Samningurinn er rökrétt framhald af þeirri forvinnu sem hefur átt sér stað í verkefninu undanfarin misseri,“ segir Magnús Blöndal sviðsstjóri Slippsins Akureyri í tilkynningu frá fyrirtækinu.