Ný færavinda frá DNG – sú eldri tekin upp í

DNG hefur þróað nýja handfæravindu, sem kemur í stað þeirrar sem upphaflega var byrjað að framleiða árið 1995. Að því er kemur fram í frétt frá DNG var orðið erfitt að nálgast ýmsa íhluti og rafbúnað í upprunalegu vindurnar vegna framþróunar í rafeinda- og hugbúnaði á heimsmarkaði og framleiðslu þeirra var því hætt.

C6000 færavindan sem byrjað var að framleiða árið 1995 var byltingarkennd framþróun í handfæraveiðum á Íslandi, að því er segir á ef Slippsins - DNG. Þó að vindunni hafi í grunninn lítið verið breytt á þessum 30 árum þá var hún í stöðugri þróun en hún er enn þann dag í dag algengasta handfæravinda í smábátaflotanum.

Hægt að setja gamla færavindu sem greiðslu upp í nýja

Í stað hennar hefur verið þróuð ný vinda, R1, sem nú er komin á markað og er enn fjölhæfari og öflugri en forveri hennar. „Óhætt er að segja að nýja R1 vindan samein[i] alla bestu eiginleika forvera sinna jafnframt því að byggja á nýjustu tækni og skila auknum afköstum við handfæraveiðar,“ segir í frétt DNG, og að nýja vindan hafi fengið mikið lof hjá smábátasjómönnum sem hafa notað hana.

Sökum þess að nánast ómögulegt er að nálgast nýja íhluti í gömlu C6000 vindurnar mun DNG hætta að þjónusta þær í áföngum á næstu tveimur árum. Í staðinn mun DNG taka gamlar vindur sem greiðslu upp í nýjar R1 vindur. Að auki býður DNG upp á sérstaka ráðgjöf þar sem eigendur C6000 vinda geta komið með þær og fengið ráðleggingar um viðgerð, yfirferð eða uppfærslu.