Sex hæðir of mikið að mati skipulagsráðs

Skipulagsráð telur hugmyndir Hrísalundar ehf. um byggingu fjölbýlishúss að Hrísalundi 3 fela í sér of háa byggingu. Fyrirliggjandi tillaga eigenda gerir ráð fyrir sex hæða húsi ásamt bílakjallara, en það er mat skipulagsráðs að lækka þurfi húsið um að lágmarki eina hæð. Skipulagsráð fer einnig fram á vinnslu vindgreiningar og nánari útlistun á skuggavarpi og útliti byggingarinnar.

Þetta kemur fram í afgreiðslu skipulagsráðs á erindi Hrísalundar ehf. þar sem lögð er fram tillaga að nýju deiliskipulagi fyrir Hrísalund 3-5. Akureyri.net hefur áður fjallað um hugmyndir að uppbyggingu á lóðinni þar sem Kristjánsbakarí var starfrækt umárabil. Í vinnslu er breyting á aðalskipulagi sem felur í sér að svæði sem nær til lóða við Hrísalund 1-5 verði skilgreint sem miðsvæði fyrir hreinlega atvinnustarfsemi með heimild fyrir íbúðir á efri hæðum.

Bókun skipulagsráðs: „Að mati skipulagsráðs felur fyrirliggjandi tillaga í sér uppbyggingu á of háu húsi í samhengi við nánasta umhverfi. Að mati ráðsins þarf að lágmarki að lækka húsið um eina hæð. Við nánari útfærslu á mögulegri uppbyggingu þarf að vinna vindgreiningu til að sjá möguleg áhrif byggingarinnar á vindvist á svæðinu auk nánari útlistunar á skuggavarpi og útliti húss. Þá er einnig nauðsynlegt að leggja fram gögn sem sýna umfang uppbyggingarinnar í samhengi við nánasta umhverfi.“