Samstarf Norðurorku og Dalvíkurveitna?

Norðurorka hefur til athugunar beiðni sveitarstjóra Dalvíkurbyggðar um að skoða möguleika á því að koma að rekstri veitna sveitarfélagsins. Norðurorka hefur tekið jákvætt í málið og svaraði sveitarstjóra formlega með bréfi 13. október. Byggðaráð Dalvíkurbyggðar tók málið formlega fyrir á fundi 16. október og fól sveitarstjóra að vinna málið áfram í formi tímabundinnar úrlausnar. 

Viðræður eru á frumstigi að því er fram kemur í fundargerð stjórnar Norðurorku 28. október. Þar segir að væntingar séu til þess að málið vinnist hratt og að hægt verði að ganga frá samningi innan skamms tíma. 

Hitaveita Dalvíkur nýtir jarðhita úr tveimur jarðhitakerfum, við Hamar í Svarfaðardal og við Brimnesborgir. Svæðið að Hamri hefur nýst Dalvíkingum til húshitunar frá 1969, en þaðan kemur um 64 gráðu heitt vatn. Þar eru tvær aðalvinnsluholur. Lokið var við borun á fyrri holunni 1977 og þeirri seinni tíu árum síðar. Hitt jarðhitakerfið sem Hitaveita Dalvíkur nýtir, við Brimnesborgir, var virkjað 1998 og hefur séð byggðakjörnunum á Árskógssandi og Hauganesi, ásamt þjónustu- og iðnaðarsvæðinu við Árskóga fyrir eitu vatni. Jafnframt hefur heitu vatni frá Brimnesborgum verið veitt inn í Svarfaðardal frá 2007. Borun fyrri holunnar við Brimnesborgir lauk 1997 en þeirri seinni árið 2006. 

Um vatnsveitu Dalvíkurbyggðar er hins vegar takmarkaðar upplýsingar að finna á vef sveitarfélagsins.