Rúnar Sigtryggsson tekur við HSG Wetzlar

Akureyringurinn Rúnar Sigtryggsson hefur verið ráðinn þjálfari þýska handknattleiksfélagsins HSG Wetzlar sem leikur í efstu deild þar í landi, Handbolta-Bundseligunni (HBL), og stýrir liðinu í fyrsta skipti í útileik á sunnudag þegar liðið mætir Füchse Berlin. Rúnar hefur skrifað undir samning við þýska félagið út leiktíðina 2026-27. Þetta kemur fram í tilkynningu félagsins í dag.

Gengi Wetzlar hefur verið afleitt það sem af er tímabilinu og situr liðið nú í neðsta sæti deildarinnar með fimm stig, jafn mörg stig og Leipzig þar sem Rúnar var þjálfari frá hausti 2022 þar til í lok síðasta tímabils. 

Í tilkynningu félagsins er vitnað í Rúnar um ráðninguna og fær akureyri.net hér lánaða þýðingu af handboltavefnum, handbolti.is: 

„Ég hef fylgst mjög náið með þýsku úrvalsdeildinni undanfarna mánuði og einnig séð nokkra leiki með HSG Wetzlar. Í liðinu eru klárlega nægir hæfileikar til að halda sæti sínu í deildinni. Þess vegna er ég mjög ánægður með að við skyldum ná saman svona fljótt. Ég þurfti ekki að hugsa mig lengi um hvort ég vildi takast á við þetta verkefni. Vissulega er staðan erfið um þessar mundir, en ég er sannfærður um að við munum finna leiðina upp úr fallsæti,“ segir Rúnar Sigtryggsson í tilkynningu félagsins.