Umræðan

Risahelgi í körfunni – Pollamót og tvíhöfði

Haraldur Ingólfsson skrifar 02. október 2026 | kl. 06:00

Nýir þjálfarar hafa tekið við stjórninni hjá báðum Þórsliðunum, Rúnar Ólason þjálfar karlaliðið og Jón Ingi Baldvinsson kvennaliðið. Þegar tilkynnt var um ráðningu þeirra endurnýjuðu Emma Karólína Snæbjarnardóttir og Karen Lind Helgadóttir samninga við félagið. Karen Lind er jafnframt aðstoðarþjálfari Jóns Inga. Mynd: Þór körfubolti.

Upphaf körfuboltavertíðarinnar hjá Þórsliðunum verður með dálítið óvenjulegum hætti. Árlegt Pollamót Þórs í körfubolta hefur fest sig í sessi og er á dagskránni í dag og á morgun. Strax á sunnudag, í framhaldi af mótinu, eiga svo bæði meistaraflokksliðin heimaleik og má segja að þá verði Þór í fjórða veldi á dagskrá, Akureyri gegn Þorlákshöfn, fyrst í kvennaflokki kl. 15.30 og svo karlaliðin kl. 18.

Miklar breytingar hafa átt sér stað á körfuboltaliðum Þórs, bæði í leikmannahópunum og í þjálfarateymum þar sem nýir þjálfarar eru komnir til starfa. Rúnar Ólason hefur tekið við stjórn karlaliðsins og Jón Ingi Baldvinsson stýrir kvennaliðinu. Akureyri.net fer yfir leikmannamálin hjá liðunum og fær sýn þjálfaranna á veturinn. En fyrst að Pollamótinu.

Stærsta Pollamótið í körfubolta til þessa

Pollamót Þórs í körfubolta verður fjölmennara í ár en nokkru sinni fyrr, tíu fleiri lið en í fyrra, sem var metár. Það verður því mikið um að vera í Íþróttahöllinni og svo í Sjallanum að móti loknu.

Ekki verður minnst á Pollamót Þórs og Skógarbaðanna án þess að geta krúttlegrar auglýsingaherferðar þeirra sem standa að mótinu. Sævar Ingi Rúnarsson er þar í aðalhlutverki og greinilegt að undirbúningur hófst snemma því sumar klippurnar sýna hann á hinu Pollamótinu, í fótboltanum í byrjun júlí.

Ungt lið með samheldni og baráttu að vopni

Undanfarin ár hefur kvennalið Þórs verið á mörkunum að hafa nógu fjölmennan hóp til að halda úti góðum æfingum og samkeppnishæfu liði og því illa mátt við meiðslum leikmanna. Hópurinn er ekki fjölmennur, níu leikmenn kynntir á leikmannakynningu og raunar ein úr þeim hópi, Hanna Jónasdóttir, sem er of ung til að mega spila í meistaraflokki en mun væntanlega æfa af krafti með liðinu. Í stað fjögurra erlendra leikmanna sem liðið hafði í sínum röðum í fyrra eru nú tvær körfuboltakonur mættar norður, önnur bandarísk og hin frá Svartfjallalandi.

Jón Ingi Baldvinsson, nýr þjálfari Þórs, er flestum hnútum kunnugur í körfuboltanum hjá Þór enda hefur hann bæði komið að þjálfun, stjórnarstörfum og öðrum störfum sem sjálfboðaliði. Hann var inntur eftir því hvaða vonir og væntingar hann hefur fyrir komandi tímabil.

Emma Karólína Snæbjarnardóttir, leikmaður ársins í 1. deild kvenna í fyrra, er hér í baráttu við leikmenn Selfoss. Myndir: Guðjón Andri Gylfason.

„Liðið er töluvert breytt frá því í fyrra og því rennum við kannski aðeins blint í sjóinn varðandi styrk liðins innan deildarinnar,“ segir Jón Ingi. „Ég vona samt að við munum berjast í efri hlutanum í deildinni.“ Hann nefnir Emmu Karólínu Snæbjarnardóttur, sem valin var leikmaður ársins í deildinni í fyrra, verði áfram með liðinu, ásamt því að íslenski kjarninn frá því í fyrra verði áfram og á þar við Karen Lind, Sigurlaugu Evu og Maríu Sól. Þá hafi félagið fengið liðsstyrk í Natalíu, Kristnýju og Bríeti Maríu sem koma til Akureyrar til náms, og auk þess tekur Vaka fram skóna að nýju. „Þannig að þetta lítur ágætlega út og ég er ánægður með hópinn. Styrkleiki liðsins verður samheldni og barátta. Við munum mikið treysta á bakverðina okkar, að þær leiði liðið áfram.“

Jón Ingi vonast til að hjálpa leikmönnum við að bæta sig og bæta við sig nýjum styrkleikum. „Ég er með ungt lið í höndunum og ég mun leggja áherslu á að leikmenn bæti sig í vetur og bæti við sig nýjum styrkleikum. Mig langar til að við reynum að keyra aðeins upp hraðann og spila skemmtilegan bolta. En svo verðum við bara að sjá hvernig það mun ganga.“

María Sól Helgadóttir er ein af þeim ungu körfuboltakonum sem hefur komið upp úr yngri flokkum Þórs. Hún hefur reyndar einnig spilað fótbolta og kom við sögu í 14 leikjum með meistaraflokki Dalvíkur/Reynis í 2. deildinni í sumar. Mynd: Helgi Heiðar Jóhannesson.

Leikmenn Þórs:

Bríet María Ásgeirsdóttir, bakvörður
Emma Karólína Snæbjarnardóttir, bakvörður
Hanna Jónasdóttir, bakvörður
Karen Lind Helgadóttir, bakvörður
Kristný Bragadóttir, bakvörður
María Sól Helgadóttir, bakvörður
Natalía Mist Þráinsdóttir Norðdahl, bakvörðrur
Sigurlaug Eva Jónasdóttir, bakvörður
Nile Miller, framherji
Ksenija Kuzmanovic, framherji

Komnar

Bríet María Ásgeirsdóttir, bakvörður
Hanna Jónasdóttir, bakvörður
Kristný Bragadóttir, bakvörður
Natalía Mist Þráinsdóttir Norðdahl, bakvörðrur
Nile Miller, framherji
Ksenija Kuzmanovic, framherji

Farnar

Emilie Ravn
Yvett Adriaans
Hjörtfríður Óðinsdóttir
Iho Lopez
Kristín María Snorradóttir
Hrefna Ottósdóttir
Chloe Wilson

Kröftugir í sókn, ágengir í vörn

Karlaliðið er heldur fjölmennara en kvennaliðið, 17 leikmenn kynntir á leikmannakynningu félagsins á dögunum. Þar hafa einnig orðið miklar breytingar og alls 11 leikmenn sem komu við sögu í fyrra sem ekki eru í hópnum núna, en átta komnir inn í staðinn. Nokkrir þeirra eru ungir og efnilegir leikmenn sem koma upp úr yngri flokkum félagsins, en einnig koma inn tveir nýir erlendir leikmenn í stað þeirra sem spiluðu í fyrra. Þá má nefna að Baldur Örn Jóhannesson mætir aftur til leiks.

Ungir og efnilegir leikmenn koma upp úr yngri flokkum Þórs og verða hluti af meistaraflokkshóps félagsins í vetur. Hér undirrita þrír þeirra samninga við félagið. Frá vinstri. Guðjón Andri Gylfason, formaður körfuknattleiksdeildar Þórs, Tryggvi Már Elínarson, Ármann Tumi Bjarkason og Bergvin Ingi Magnússon.

Rúnar Ólason var ráðinn til starfa sem þjálfari karlaliðs Þórs í sumar. Hann er nokkuð bjartsýnn á gengi liðsins þegar hann er spurður út í vonir og væntingar fyrir veturinn.

„Við ætlum að vera samkeppnishæfir í hverjum leik og bæta okkur stöðugt yfir veturinn og stefnum á að vera í baráttuinni þegar líður á veturinn. Við erum með ungan og kraftmikinn hóp og leikmenn sem vilja bæta sig og sanna. Við komum til með að nýta breiddina og spila öflugan liðsbolta. Ég vil spila hraðan og óeigingjarnan körfubolta þar sem leikmenn lesa leikinn og taka réttar ákvarðanir. Varnarlega verðum við agressífir og leggjum okkur alla fram í hvern einasta leik,“ segir Rúnar um liðið sem hann hefur í höndunum.

Á leikmannakynningu fyrir stuttu kom fram í máli Rúnars að hann teldi raunhæft að berjast um sæti 2-5, sem eru þau sæti sem gefa heimaleikjarétt í fyrstu umferð umspilsins um sæti í Bónusdeildinni.

Leikmenn Þórs í 1. deild karla