María með tilboð frá þremur erlendum liðum

Allar líkur eru á að knattspyrnukonan María Catharina Ólafsdóttir Gros sé á förum frá Þór/KA. Hún hefur fengið tilboð um samning frá þremur erlendum félögum í jafn mörgum löndum skv. heimildum Akureyri.net og það ætti að skýrast fyrr en síðar hvert leiðin liggur.

María Catharina, sem verður tvítug í næsta mánuði, kom fyrst við sögu með meistaraflokki hjá Þór/KA 2018, aðeins 15 ára gömul. Hún á að baki 66 meistaraflokksleiki, flesta með Þór/KA, en einnig þrjá með Hömrunum þegar hún var þar í láni hluta sumars 2019. Hún hefur skorað 10 mörk með meistaraflokki. Þá hefur María verið í yngri landsliðum Íslands og á samtals að baki 29 leiki og þrjú mörk með U19, U17 og U16 landsliðunum.

María Catharina hélt utan til Skotlands í atvinnumennsku á miðju tímabili 2021 þegar hún gerði samning við hið sögufræga félag Celtic. Hún rifti samningi sínum að lokinni leiktíðinni og lék  með Þór/KA á ný frá miðju síðasta sumri.