Krefja Vegagerðina um rök fyrir hækkun gjalds

Bæjarstjórn Akureyrar lýsir yfir vonbrigðum með hækkun á gjaldskrá Hríseyjarferjunnar Sævars sem Vegagerðin hefur boðað frá og með næstu mánaðamótum. Kallað verður eftir rökstuðningi Vegagerðarinnar.

Málið var rætt á fundi bæjarstjórnar í dag og eftirfarandi bókað: 

Bæjarstjórn lýsir yfir vonbrigðum með boðaða hækkun á gjaldskrá Hríseyjarferjunnar Sævars, þar sem gert er ráð fyrir að fargjald fullorðinna í upphringiferðir rúmlega tvöfaldist og fargjald ungmenna, öryrkja og ellilífeyrisþega í sömu ferðir rúmlega fjórfaldist. Bæjarstjórn felur bæjarstjóra að kalla eftir rökstuðningi hjá Vegagerðinni. 

Eins og Akureyri.net greindi frá í morgun eru eyjarskeggjar eru afar ósáttir við hækkunina, aðallega á svokölluðum upphringiferðum. Það eru ferðir sem mögulegar eru á ákveðnum tímum, en skipið siglir þó ekki nema sérstaklega hafi verið óskað eftir því.

Fullt upphringigjald er nú 1.700 krónur en fer upp í 3.700 krónur fyrir alla farþega, 12 ára og eldri.

• Fram að þessu hafa 12-15 ára og örorku- og ellilífeyrisþegar greitt hálft gjald fyrir þessa þjónustu, 850 kr.
• Er þetta verðhækkun um 117,6% miðað við almenna fargjaldið og 362,5% miðað við gjald barna, aldraðra og öryrkja.

Frétt Akureyri.net í morgun: Mikil hækkun gjalds í Hríseyjarferjuna