Körfuboltakátt í Höllinni á Pollamóti – MYNDIR

Árlegt Pollamót Þórsara í körfubolta fór fram í Íþróttahöllinni á Akureyri um helgina. Þetta var fjölmennasta mótið hingað til, 31 lið var skráð til keppni og þátttakendur tæplega 300.

„Á Pollamóti Þórs í körfuknattleik sannast hið fornkveðna að maður er manns gaman. Gleðin var við öll völd innan sem utan vallar og þótt fólki renni stundum kappið í kinn í leik bar það ekki fegurðina ofurliði. Körfubolti er skemmtileg íþrótt þar sem allir geta fundið sína fjöl. Þá er fátt skemmtilegra en að hitta gamla félaga úr boltanum og eignast nýja,“ í frásögn af mótinu á heimasíðu Þórs.

„Þegar upp var staðið var það Landsliðið (réttnefnda) sem varð hlutskarpast í Pæjudeildinni (20 ára og eldri konur). UMFGB unnu Polladeildina (25 til 39 ára karla) og UBK stóð uppi sem sigurvegari í Lávarðadeildinni (karlar 40 ára og eldri),“ segir þar.

Á heimasíðu Þórs er nánari frásögn af keppni á mótinu og fjörugu lokahófi. Auk þess má þar sjá fjölda mynd. Smellið hér til að sjá meira.