KA-menn snéru erfiðri stöðu sér í hag og unnu

KA-menn unnu frækinn sigur á liði Aftureldingar í toppbaráttu Íslandsmóts karla í blaki í Mosfellsbæ í gær. Heimamenn komust í kjörstöðu með því að vinna fyrstu tvær hrinurnar, 25:19 og 25:21, en sigra þarf í þremur til að vinna leikinn.

Þótt þeir hafi verið komnir með bakið upp við vegg neituðu KA-menn að játa sig sigraða og snéru leiknum sér í hag með magnaðri frammistöðu: jöfnuðu metin með sigri í þriðju og fjórðu hrinu, 28:26 og 25:20, og tryggðu sér svo sigur með því að vinna oddahrinuna 15:13.