Umræðan

Jöfnunarstöð og brú – eina tilboðinu hafnað

Haraldur Ingólfsson skrifar 22. maí 2025 | kl. 15:00

Jöfnunarstoppstöð SVA eins og hún lítur út í útboðsgögnum Akureyrarbæjar.

Umhverfis- og mannvirkjaráð Akureyrarbæjar hefur hafnað tilboði í gerð göngu- og hjólabrúar yfir Glerá ásamt jöfnunarstoppstöð fyrir Strætisvagna Akureyrar.

Fyrir fundi ráðsins núna í vikunni lá niðurstaða úr útboði á verkunum. Aðeins eitt tilboð barst og var það 55% yfir kostnaðaráætlun. Ráðið ákvað því að hafna tilboðinu og felur sviðsstjóra umhverfis- og mannvirkjasviðs að vinna málið áfram.

Hér má sjá staðsetningu væntanlegrar göngu- og hjólabrúar yfir Glerá, um 50 metrum ofan við núverandi vegbrú á Hörgárbraut, á móts við núverandi biðstöð SVA gegnt Glerártorgi. Skjáskot úr útboðsgögnum.

Umhverfis- og mannvirkjasvið Akureyrarbæjar auglýsti í lok mars eftir tilboðum í verkin.

Eins og fram kom í frétt Akureyri.net fyrr í mánuðinum gagnrýndi Sindri S. Kristjánsson (S) stjórnsýsluna við málið þar sem verkið hafði verið boðið út áður en bæjarstjórn hafði formlega samþykkt breytingar á aðal- og deiliskipulagi í tengslum við þessar framkvæmdir.

Skipulagsbreytingarnar voru samþykktar með sjö atkvæðum á bæjarstjórnarfundi núna í vikunni.

Til baka í umræðuna