Hótel Gjá fjármagnað af Íslandsbanka

Íslandsbanki hefur veitt Skógarböðunum framkvæmdalán til fjármögnunar á 120 herbergja hóteli með heilsulind, veitingaaðstöðu og ráðstefnusal. Hótelið verður nefnt Gjá og gert er ráð fyrir að verklok verði á árinu 2027. Þá verða ársstörf við Skógarböðin orðin um 120.

„Við höfum átt mjög gott samstarf við bankann og erum ánægð og ekki síst þakklát fyrir það traust sem okkur hefur verið sýnt frá fyrsta degi. Það er mikið verkefni framundan og við ætlum að leggja okkur fram um að geta árið 2027 boðið upp á einkar áhugaverðan kost tengdan viðburðaferðamennsku,“ segir Sigríður Hammer stjórnarformaður Hótels Gjár og Skógarbaða. Íslandsbanki fjármagnaði einnig framkvæmdir við stækkun á laugum Skógarbaðanna og er áætlað að nýi hlutinn verði opnaður í haust.

Mikið framfaraskref

„Rekstur Skógarbaðanna hefur gengið vel frá opnun og er tilkoma þeirra mikið framfara skref fyrir ferðaþjónustuna á svæðinu. Margt heimafólk hefur keypt vetrarkort í böðin og hefur aðsókn heimafólks verið ein helsta forsenda velgengni baðanna,“ segir í tilkynningu um fjármögnunina. „Nú er í fyrsta skiptið boðið upp á árskort í böðin en talsvert hefur verið óskað eftir slíku af heimafólki. Allir hluthafar koma frá svæðinu hér á Akureyri og hafa sterka tengingu við það og vilja stuðla að frekari uppbyggingu þess. “

Ekki er áætlað að greiða út arð úr rekstri Skógarbaða næstu árin heldur á arðsemi rekstursins að renna inn í nýtt hótelverkefni.

Norðurland spennandi

„Það hefur verið einstaklega skemmtilegt að fylgjast með uppbyggingu Skógarbaðanna sem hafa stutt við kröftuga ferðaþjónustu á Norðurlandi,“ segir Jón Birgir Guðmundsson útibússtjóri Íslandsbanka á Akureyri. „Með byggingu á glæsilegu hóteli við Skógarböðin eru enn frekari skref stigin í því að gera Norðurlandið að spennandi áfangastað. Íslandsbanki vill vera hreyfiafl til góðra verka og er þetta verkefni gott dæmi um það en bankinn hefur verið þátttakandi í vegferð Skógarbaðanna frá upphafi. Samstarfið hefur verið mjög gott og eigendur og stjórnendur eiga mikið hrós skilið fyrir framkvæmd verkefnisins. Við hlökkum til áframhaldandi samstarfs,“ segir Jón Birgir.