Unnið að breyttri aðkomu að Hömrum

Framkvæmdir eru hafnar við breytingar á aðkomu að tjaldsvæðinu á Hömrum. Komið verður á einstefnuakstri, þar sem ekið verður inn á tjaldsvæðið til suðurs og út til norðausturs. Vegurinn að Hömrum greinist þá í tvennt fyrir neðan þjónustuhúsið – ný aðkoma mun liggja norðan við húsið og sveigja til suðurs vestan við húsið. Þegar er búið að leggja þann veg en eftir er að ganga frá bílastæðum og gatnamótum við þjónustuhúsið. Einnig er verið að leggja stíg frá þjónustuhúsinu fyrir gangandi og hjólandi umferð niður að gatnamótunum við Kjarnagötu.

Í minnisblaði umhverfis- og mannvirkjasviðs um verkefnið kemur fram að markmiðið sé að bæta aðgengi gesta og heimamanna að Hömrum, sérstaklega yfir sumartímann þegar aðsókn er mest. Undanfarin ár hafi komið í ljós að núverandi aðkoma ræður illa við þann fjölda sem sækir svæðið, sem leitt hafi til umferðaröngþveitis innan tjaldsvæðisins. Slíkar aðstæður skapi verulega hættu fyrir umferðaröryggi gangandi, hjólandi og akandi vegfarenda. Í minnisblaðinu kemur einnig fram að framkvæmdirnar muni tryggja greiða og örugga leið af svæðinu ef eldur kemur upp, og bæta aðgengi viðbragðsaðila til muna.

Kostnaðaráætlun gerir ráð fyrir að framkvæmdin kosti um 30 milljónir króna.