Drífum í að stytta hringveginn

Í síðustu viku ók ég frá Akureyri til Reykjavíkur. Það er svo sem ekki í frásögur færandi. Ég fór nokkur hundruð keppnisferðir sömu leið og hef því verulega reynslu af þjóðveginum. Í hvert einasta skipti sem leið mín liggur um Langadalinn fyllist ég fýlu. Fýlu vegna þess að ekki er hægt að stytta vegalengdina milli þessara staða um tuttugu kílómetra. Það er vegna þvermóðsku íbúa á Blönduósi og nágrenni sem þurfa að halda lífinu í greiðasölunni á N1 olíufélaginu. Það er þjóðhagslega afar hagkvæmt að stytta leiðina og hreint ótrúlegt að heimamenn og þingmenn þeirra geti komið í veg fyrir framkvæmdir. Lög um að heimamenn hafi skipulagsvaldið eru fráleit og ríkisvaldið þarf að grípa inn í. Þetta er hagstæðasta möguleg framkvæmd á öllum hringveginum og yfirgnæfandi meirihluti þjóðarinnar er hlynntur henni. Drífum í þessu.

Jóhannes Gunnar Bjarnason er kennari