Svæðisborgin Akureyri

Efling Akureyrar skiptir okkur Norðlendinga og í raun landsmenn alla miklu máli.

 

Fjölbreytt menning, þjónusta, verslun og opinber þjónusta, m.a. á sviði mennta- og heilbrigðisþjónustu, í svæðisborginni Akureyri treystir búsetuskilyrði Norðlendinga. Íbúafjöldi Akureyrar og nærsveitarfélaga er á þriðja tug þúsunda og er það fjölmennasta byggðin utan suðvesturhorns landsins. Óneitanlega væri Ísland einsleitara ef blómlegrar Akureyrar nyti ekki við og mikilvægt er að þekkingarbrunnur sem myndast hefur t.d. í HA geti orðið að drifkrafti til uppbyggingar landsbyggðarinnar allrar og þar með landsins alls.

 

 

Einn mikilvægasti þáttur í framþróun atvinnulífs er að tryggja virka samkeppni og að stjórnvöld hafi vakandi auga fyrir því að markaðsráðandi staða sé ekki misnotuð. Mikilvægt er að minni aðilar sitji við sama borð og þeir stóru og tryggt sé að duglegir nýliðar með nýjar hugmyndir geti haslað sér völl í atvinnulífi. Að öðrum kosti er það bein ávísun á hnignun, einokun og okur.

 

Fyrir rúmum áratug hafði nánast enginn heyrt getið um fasteignafélög enda áttu landsmenn íbúðir eigin sínar. Í kjölfar hrunsins fóru margar íbúðir á uppboð og fasteignafélögunum óx snarlega fiskur um hrygg. Þau eru jafnvel komin með markaðsráðandi stöðu. Sumt af því fjármagni sem kom til uppkaupa á húsnæði kom nánast beint úr aflandsfélögum sem gafst kostur á að koma inn með íslensku krónuna með sérstökum afslætti.

 

Einn þátturinn sem hefur verið nefndur sem orsök mikils íbúðarkostnaðar, einkum á höfuðborgarsvæðinu, er annars vegar skortur á húsnæði og hins vegar sterk staða leigufélaga sem hafa gengið á lagið og hækkað leiguverð stigvaxandi.

 

Það er mikilvægt að þessi staða sé höfð í huga þegar verið er að úthluta byggingarlóðum þannig að félagasamtök og óhagnaðardrifin félög á borð við félög eldri borgara verði sett í forgang við úthlutun lóðanna.

 

Sama staða er því miður uppi þegar kemur að atvinnuhúsnæði á Akureyri. Nýlegt og sláandi dæmi um það er barátta Davíðs gegn Golíat á Glerártorgi, þar sem fataverslunin Imperial neyddist til að yfirgefa Torgið eftir 17 ára farsælan rekstur. Það sýnir hversu þungt það getur verið fyrir sjálfstæðan kaupmann að verja lífsstarf sitt gagnvart umsvifamikilli samstæðu með markaðsráðandi stöðu í verslunarhúsnæði á Akureyri.

 

 

Miklu máli skiptir að stjórnvöld, hvort sem um ræðir staðbundin eða á landsvísu, hugsi um að tryggja virka samkeppni til framtíðar, t.a.m. þannig að þeim sé unnt að tryggja að framboð lóða sé stöðugt og í takti við þarfir samfélagsins og þannig að ekki skapist einokun sem skaði framþróun samfélagsins.

 

Einnig er mikilvægt að stjórnvöldum sé fært að bregðast við misfellum af sem mestri skilvirkni. Hér skiptir máli að meginreglunni um skjóta málsmeðferð sé veitt sérstakt vægi – bið eftir réttlæti er enda í sjálfu sér ranglæti.