Boltavikan endar með bæjarslag á sunnudag
Það verður nóg um að vera hjá Akureyrarliðum í íþróttum í vikunni fram undan, bæði heima og að heiman. Körfubolti, handbolti, blak, íshokkí og svo bæjarslagur í handboltanum á sunnudag þegar Þór tekur á móti KA í Olísdeild karla í handbolta.
- Körfubolti – Í næstefstu deild Íslandsmóts kvenna í körfubolta, Bæjarins beztu deildinni eins og hún nefnist, tefla tvö Suðurnesjafélög fram b-liðum sínum. Kvennalið Þórs tekur á móti öðru þeirra, Keflvíkingum, á þriðjudag. Þór hefur unnið fjóra af fimm fyrstu leikjum sínum og er jafnt Selfossi og Haukum í 2.-4. sæti deildarinnar. Keflavík b kemur fast á hæla þeirra með þrjá sigra úr fimm fyrstu leikjum sínum.
- Handbolti – Bikarkeppni HSÍ í handknattleik kvenna er að fara í gang og fara sex leikir fram núna í vikunni. KA/Þór sækir Fjölni heim í Grafarvoginn á miðvikudag. Fjölnir leikur í næstefstu deild Íslandsmótsins, Grill 66 deildinni og er þar í 5. sæti, en KA/Þór er í 7. sæti efstu deildar. Það má því búast við sigri KA/Þórs, en í bikarkeppni getur auðvitað ýmislegt gerst þótt lið spili ekki í sömu deild.
- Blak – Blaklið KA í efstu deildum karla og kvenna, Unbroken-deildunum, fara bæði í Mosfellsbæinn á laugardag og mæta Aftureldingu. Karlaliðin spila á undan, en þar er KA í 5. sæti deildarinnar með átta stig og Afturelding í 6. sætinu með fjögur stig. Bæði liðin nokkuð frá toppbaráttunni í stigum talið, enn sem komið er. Kvennalið sömu félaga mætast einnig, og þar er KA einnig sæti ofar en Afturelding. KA er í 2. sæti Unbroken-deildar kvenna með 13 stig og Afturelding í 3. sætinu með 11 stig.
- Handbolti – Vikan verður annasöm hjá handboltakonunum í KA/Þór því þær fá stutta hvíld eftir bikarleikinn við Fjölni. Strax á laugardag koma Eyjakonur í ÍBV norður og mæta KA/Þór í 10. umferð Olísdeildarinnar. Eyjakonur geta verið erfiðar við að eiga, eins og þær sýndu á dögunum þegar þær voru fyrstar til að hirða stig af toppliði Hauka með 31-31 jafntefli í Hafnarfirði. ÍBV er í 2. sæti deildarinnar með 15 stig úr fyrstu níu leikjunum, en KA/Þór er í 7. sætinu með fjögur stig
- Íshokkí – Hokkíkonurnar í Skautafélagi Akureyrar hafa byrjað keppnistímabilið af krafti og eru efstar í Toppdeildinni með 13 stig úr fyrstu fimm leikjum sínum. Reykjavíkurfélögin eru bæði með fjögur stig, Fjölnir úr fjórum leikjum og SR úr fimm. SA hefur unnið fjóra leiki og tapað einum eftir framlengingu og vítakeppni. Það var gegn SR, en þessi lið mætast einmitt í Skautahöllinni á Akureyri á laugardag.
- Körfubolti – Kvennalið Þórs í körfuboltanum á tvo leiki fram undan í vikunni, þann seinni á laugardag þegar Selfyssingar koma í heimsókn. Þar má búast við jöfnum og spennandi leik. Þegar þetta er skrifað eru liðin í 2. og 3. sæti deildarinnar, Selfyssingar með fimm sigra í sex leikjum og Þór mað fjóra sigra í fimm leikjum.
- Handbolti – Á sunnudag er komið að bæjarslag í handboltanum þegar Þór tekur á móti KA í seinni viðureign þessara félaga í Olísdeild karla. Leikurinn er í 11. umferð mótsins, en liðin mættust í KA-heimilinu í 3. umferðinni fyrr í haust. Þar hafði Þór sigur, 35-31. Að loknum tíu umferðum er KA í 3. sæti deildarinnar með 14 stig, en Þór í 9. sætinu með sex stig. Nánar verður fjallað um bæjarslaginn þegar líður á vikuna.
ÞRIÐJUDAGUR 17. NÓVEMBER - körfubolti
- Körfubolti
Bæjarins beztu deild kvenna, 7. umferð
Íþróttahöllin á Akureyri kl. 19:30
Þór - Keflavík b
MIÐVIKUDAGUR 18. NÓVEMBER - handbolti
- Handbolti
Bikarkeppni HSÍ
Fjölnishöllin í Grafarvogi kl. 19
Fjölnir - KA/Þór
LAUGARDAGUR 21. NÓVEMBER - blak, handbolti, íshokkí, körfubolti
- Blak
Unbroken-deild karla
Íþróttahúsið að Varmá kl. 13:30
Afturelding - KA
- Blak
Unbroken-deild kvenna
Íþróttahúsið að Varmá kl. 15:30
Afturelding - KA
- Handbolti
Olísdeild kvenna, 10. umferð
KA-heimilið kl. 15:30
KA/Þór - ÍBV
- Íshokkí
Toppdeild kvenna
Skautahöllin á Akureyri kl. 16:45
SA - SR
- Körfubolti
Bæjarins beztu deild kvenna, 8. umferð
Íþróttahöllin á Akureyri kl. 18:00
Þór - Selfoss
SUNNUDAGUR 22. NÓVEMBER - handbolti
- Handbolti
Olísdeild karla, 11. umferð
Íþróttahöllin á Akureyri kl. 18:00
Þór - KA
Stöður í deildum og leikjadagskrár
Blak
- Unbroken-deild kvenna | BLÍ
- Unbroken-deild karla | BLÍ
- Kjörísbikar kvenna | BLÍ
- Kjörísbikar karla | BLÍ
Handbolti
Íshokkí
Körfubolti
Lesendur eru hvattir til að minna á íþróttaviðburði hvers kyns sem fram undan eru í meistaraflokkum, sérstaklega ef eitthvað verður út undan og gleymist í þessari vikulegu yfirferð í vikubyrjun hér á akureyri.net – sendið tölvupóst í haraldur@akureyri.net ef koma þarf slíkum upplýsingum á framfæri.
Tíu milljarða halli
Tenerife í stað Kaupmannahafnar – eru áherslurnar réttar?
Icelandair ætti að horfa norður
Mikilvæg skref í átt að samþættingu þjónustu við eldri borgara