Blak: KA-konur höfðu betur í nágrannaslag

KA vann mikilvægan sigur á Völsungi í efstu deild kvenna í blaki, Unbroken-deildinni, í KA-heimilinu í gær. Sigurinn var öruggur og þurfti KA ekki nema þrjár hrinur til að klára leikinn.

Með sigri í leiknum hefðu þær húsvísku getað nálgast KA í öðru sæti deildarinnar en úrslitin þýða að bilið milli liðanna breikkaði talsvert. KA hefur nú 31 stig í öðru sætinu en Völsungur 21 stig í því þriðja. HK er sem fyrr á toppnum og hefur 40 stig en hefur leikið einum leik fleira en KA.

Sigurinn í gær var aldrei í hættu og hrinurnar fóru 25:16, 25:18 og 25:20.

Stelpurnar hafa þó ekki tíma til að fagna lengi því næsta verkefni er strax annað kvöld, föstudag 23. janúar. Þá fara þær austur í Neskaupstað og leika við heimakonur í Þrótti í 8-liða úrslitum bikarkeppninnar.