Fara í efni
Umræðan

Áform um íbúðir fyrir aldraða í uppnámi

Eitt af húsunum við Þursaholt, nyrst í nýja Holtahverfinu, sem Búfesti ætlar að byggja. Tekið skal fram að þetta eru ekki endanlegir litir á húsinu.

Áform um byggingu margra íbúða fyrir eldri borgara í Þursaholti á Akureyri eru í uppnámi vegna nýrra lánsskilyrða Húsnæðis- og mannvirkjastofnunar (HMS). Félag eldri borgara á Akureyri og Búfesti hafa um árabil unnið saman að þessu verkefni.

Stjórn Félags eldri borgar á Akureyri skorar á HMS og innviðaráðherra að breyta sem allra fyrst þessum nýju lánaskilyrðum „svo halda megi áfram við nauðsynlegar húsbyggingar Búfestis og EBAK á Akureyri. Vert er að minna á að það bráðvantar húsnæði fyrir eldri borgara á Akureyri og þessi byggingaráform eru hluti af lausn á þeim vandræðum,“ segir meðal annars í bókun stjórnar EBAK á dögunum.

Þursaholt er nyrst í Holtahverfinu nýja.

Bókun stjórnar Félags eldri borgara á Akureyri er svohljóðandi í heild:

„Stjórn Félags eldri borgara á Akureyri (EBAK) hefur verið í góðri samvinnu við Búfesti um árabil um að byggja fjölmargar íbúðir fyrir eldri borgara að Þursaholti 2 til 6 á Akureyri. Félagið hefur komið að hönnun íbúðanna með sérstöku tilliti til þarfa eldra fólks. Búfesti er óhagnaðardrifið húsnæðissamvinnufélag sem á og rekur um 260 íbúðir á Akureyri og Húsavík. Búsetum hefur hingað til verið gert mögulegt að eiga 10 til 30 % eignarhlut í íbúðunum, en nú eru þau áform í uppnámi vegna nýrra lánaskilyrða Húsnæðis- og mannvirkjastofnunar (HMS). Stjórn Búfestis hefur frestað að fara af stað með framkvæmdir við Þursaholt þrátt fyrir að búið sé að bjóða út jarðvegsvinnu og uppsteypu á kjallara og fá mjög hagstætt tilboð í þann hluta. Í þessu verkefni er fyrirhugað að byggja allt að 100 íbúðir fyrir félagsmenn EBAK sem hafa mjög mismunandi getu til kaupa á 10-30% búseturétti. Miðað við tekjuviðmið HMS virðast um 2/3 félagsmanna Ebak ekki falla undir ný tekju- og eignamörk HMS til lánveitinga. Það getur varla verið stefna HMS og þar um leið ríkisvaldsins að byggja fjölmennar blokkir bara fyrir láglauna- og eignalítið fólk og það er alls ekki stefna Akureyrarbæjar. Góð blöndun fólks með mismunandi greiðslugetu í fjölbreytilegum hverfum og byggingum, er, að okkar mati, það sem þjónar best margbreytileika íbúa þessa lands.

Stjórn EBAK vill því skora á HMS og innviðaráðherra að breyta sem allra fyrst þessum nýju lánaskilyrðum HMS svo halda megi áfram við nauðsynlegar húsbyggingar Búfestis og EBAK á Akureyri. Vert er að minna á að það bráðvantar húsnæði fyrir eldri borgara á Akureyri og þessi byggingaráform eru hluti af lausn á þeim vandræðum.“

Náttúrubarnið Katrín Jakobsdóttir

Álfhildur Leifsdóttir, Hólmfríður Jennýjar Árnadóttir og Sigríður Gísladóttir skrifar
26. maí 2024 | kl. 13:45

Þarf forseti Íslands að vera góð manneskja?

Kjartan Ólafsson skrifar
24. maí 2024 | kl. 16:45

Um orkuöryggi og orkuskipti

Steinunn Þorsteinsdóttir skrifar
23. maí 2024 | kl. 10:51

Jákvæð sálfræði

Þóra Hjörleifsdóttir skrifar
23. maí 2024 | kl. 10:00

Vanlíðan barna er stöðugt að aukast

Berglind Ósk Guðmundsdóttir skrifar
22. maí 2024 | kl. 20:30

Sammála um að taka á neikvæðum áhrifum snjallsíma

Heimir Örn Árnason og Gunnar Már Gunnarsson skrifa
22. maí 2024 | kl. 20:00