46 tonn af rusli hreinsuð úr fráveitu

Á síðasta ári voru 46 tonn af rusli hreinsuð úr fráveitu á Akureyri að því er segir í tilkynningu frá Norðurorku. Þar segir einnig: „Í klósettið á ekkert að fara nema piss, kúkur og klósettpappír.“

Fyrir nokkrum misserum birti Norðurorka sniðugar auglýsingar um óleyfilegt niðurhal, þar sem sagði: Klósettið er ekki ruslafata. Þá var rúmlega eitt ár síðan hreinsistöð fráveitu var tekin í notkun í Sandgerðisbót og á þeim tíma höfðu 19,7 tonn af óæskilegum úrgangi verið síuð frá fráveituvatninu; 19,7 tonn af rusli sem annars hefðu borist út í Eyjafjörðinn.

Einhver kann að halda að óþarft sé að benda á það en svo er sannarlega ekki, sagði þá í frétt akureyri.net og miðað við nýja tilkynningu er ekki vanþörf á því bæjarbúar hafa aldeilis gefið í; „óleyfilegt niðurhal“ hefur meira en tvöfaldast!

Fráveituvatn er m.a. skólp, vatn frá upphitunarkerfum húsa og regn sem lendir í fráveitukerfum. Í stöðinni í Sandgerðisbót er allt slíkt fráveituvatn í bænum hreinsað áður en því er veitt út í fjörðinn.

Blautþurrkur og klútar eiga að fara í ruslið

„Hreinsistöð fráveitu var tekin í notkun árið 2020 en þar eru allir fastir hlutir sem er eru stærri en 3 millimetrar hreinsaðir úr fráveituvatninu. Þessu fasta efni er síðan pakkað og það urðað,“ segir í tilkynningu sem Norðurorka birti í gær. „Í fráveitukerfinu eru lagnir, dælustöðvar og fjöldi dæla sem koma fráveituvatninu alla leið í hreinsistöðina. Eftir því sem fasta efnið er fyrirferðarmeira í fráveitunni, verður erfiðara í dæla því áfram og hreinsa það frá. Efnið festist í lögnum og dælum, sem kallar á kostnaðarsamar viðgerðir og viðhald.“

„Fitukekkir hlaða sífellt meiru utan á sig eftir því sem þeir ferðast um kerfið en allra erfiðast er að eiga við blautþurrkur og klúta, sem eiga alls ekki að fara í klósettið heldur beint í ruslið. Blautþurrkur eru ekki hannaðar til þess að brotna auðveldlega niður, en á sumum umbúðum kemur þó fram að þær séu „flushable.“ Slíkt þýðir í raun að það sé hægt að sturta þeim niður, en ekki að þær megi fara í fráveitukerfið. Með öðrum orðum – það er vissulega hægt að setja þær í klósettið og þær skila sér út úr húsinu, en þessi merking segir ekkert til um að þær eigi að fara í fráveituna.

Blautþurrkur safna á sig fitu og öðrum úrgangi í fráveitukerfinu, stífla dælur og valda almennt miklu tjóni. Í fráveitu sem ekki er hreinsuð á leið til sjávar, líkt og gert var áður en hreinsistöðin var tekin í notkun, fara þessar blautþurrkur út í lífríkið líkt og annað plastrusl og brotna mjög lítið niður á mjög löngu tímabili.“

• Á vef Norðurorku er myndband frá hreinsistöðinni þar sem fráveitusigtin er sýnd og farið yfir hvernig blautþurrkur og annað rusl er hreinsað frá. Smellið hér til að horfa.