Skallaði mótherja og fer í þriggja leikja bann

Knattspyrnumaðurinn Ibrahima Balde, sem gekk til liðs við Þór í vetur, var í gær úrskurðaður í þriggja leikja bann af aganefnd KSÍ. 

Bannið nær einungis til leikja í Lengjubikarkeppninni. Bannið er vegna „ofsalegrar framkomu“ eins og segir í gögnum KSÍ en Balde skallaði einn leikmanna ÍR í andlitið í 1:0 sigurleik Þórs í Lengjubikarkeppninni um helgina.

Balde er 28 ára gamall miðjumaður sem hefur leikið á Íslandi undanfarin tvö ár, með Vestra, fyrst í Lengjudeildinni 2023 og svo í Bestu deildinni í fyrra.