Pistlar

Sjálfstæðisflokkurinn býður fram í Hörgársveit

Skapti Hallgrímsson skrifar 22. janúar 2026 | kl. 20:00

Frá fundi Sjálfstæðisfélagsins Drangs í Hörgársveit í gærkvöldi.

Sjálfstæðisflokkurinn mun bjóða fram í Hörgársveit í sveitarstjórnarkosningunum í vor, í fyrsta skipti undir merkjum flokksins. Þetta var ákveðið á félagsfundi í gærkvöldi og þar tilkynnti Árni Rúnar Örvarsson að hann hygðist gefa kost á sér til að leiða listann og fleiri lýstu yfir áhuga á að vera á listanum.

Þetta kemur fram í tilkynningu í dag. Hún er svohljóðandi:

Á fjölmennum félagsfundi Sjálfstæðisfélagsins Drangs í Hörgársveit í gærkvöldi var einróma samþykkt að bjóða fram í sveitarstjórnarkosningunum í maí undir merkjum Sjálfstæðisflokks og óháðra. Um er að ræða sögulega ákvörðun, þar sem í fyrsta sinn er boðið fram undir merkjum Sjálfstæðisflokksins í Hörgársveit.

Fundurinn fór fram í leikhúsinu á Möðruvöllum og var þar jafnframt ákveðið að viðhafa uppstillingu við val á framboðslista.

Á fundinum lýstu nokkrir aðilar yfir áhuga á að gefa kost á sér á listanum. Þar á meðal voru Árni Rúnar Örvarsson, framkvæmdastjóri og æðarbóndi, Aðalsteinn H. Hreinsson bóndi á Auðnum, auk Jónasar Þórs Jónassonar, sem er sitjandi sveitarstjórnarfulltrúi í Hörgársveit fyrir H-lista Hörgársveitar.

Jens Garðar Helgason, varaformaður Sjálfstæðisflokksins, sótti fundinn og sagði ákvörðunina vera í takt við þá vinnu sem farið hefur fram innan flokksins undanfarið í tengslum við sveitarstjórnarkosningarnar. Hann benti jafnframt á að greinilegur meðbyr væri með framboðum flokksins víða um land.

Á fundinum tilkynnti Árni Rúnar Örvarsson að hann hygðist gefa kost á sér til að leiða listann í komandi kosningum. Í færslu á samfélagsmiðlum í dag lagði hann áherslu á mikilvægi samráðs, ábyrgðar í ákvörðunum og þess að framtíð sveitarfélagsins verði mótuð í nánu samstarfi við íbúa.

Tilkynning Árna Rúnars Örvarssonar á Facebook

Til baka í yfirlit pistla