Opinn hádegisfundur um nýbyggingu við SAk

Sjúkrahúsið á Akureyri (SAk) og Samtök sveitarfélaga og atvinnuþróunar á Norðurlandi eystra (SSNE) efna til opins hádegisfundar um nýbyggingu sjúkrahússins, sem verður algjör bylting fyrir heilbrigðisþjónustu á starfssvæði þess, eins og segir í tilkynningu frá SAk. Fundurinn fer fram í Hofi miðvikudaginn 19. nóvember, og stendur frá kl. 12 til kl. 13. Að auki verður hægt að fylgjast með fundinum í beinu streymi.

Fram kemur að til fundarins sé meðal annars efnt vegna þess að við undirbúning nýbyggingarinnar vilji fulltrúar SAk gjarnan eiga í opnu samtali við samfélagið, svara spurningum og hlusta á ábendingar. Eins og áður segir stendur fundurinn í eina klukkustund og verður því stuttur og snarpur.

Dagskrá fundarins er eftirfarandi:

• Hildigunnur Svavarsdóttir, forstjóri SAk, opnar fundinn
• Gunnar Líndal Sigurðsson, verkefnastjóri á sviði rekstrar og klínískrar stoðþjónustu, fer yfir stöðu verkefnisins, undanfara og áætlanir
• Vænt áhrif nýbyggingar á starfsemi, sjúklinga og starfsfólk:
  • Sólveig Hulda Valgeirsdóttir, deildarstjóri lyflækningadeildar, og Bryndís María Davíðsdóttir, deildarstjóri skurðlækningadeildar
  • Gestur Guðrúnarson, deildarstjóri dag- og göngudeildar geðsviðs, og Ragnheiður Reykjalín Magnúsdóttir, aðstoðardeildarstjóri dag- og göngudeildar geðsviðs
  • Bernhard Hendrik Gerritsma, deildarstjóri legudeildar geðdeildar og Valborg Lúðvíksdóttir, aðstoðardeildarstjóri legudeildar geðdeildar
• Björn Gunnarsson, sérfræðingur á gæðadeild, fjallar um sjúkraflug

Að erindunum loknum gefst tækifæri til að spyrja spurninga. Fundarstjóri er Hilda Jana Gísladóttir, samskiptastjóri SAk. Hægt verður að kaupa súpu og brauð á staðnum.

Hlekkur á beint streymi frá fundinum