Mygla í húsnæði SAk á Kristnesi

Mygla hefur fundist á Kristnesspítala í Eyjafjarðarsveit, þar sem endurhæfinga- og öldrunarlækningadeild Sjúkrahússins á Akureyri (SAk) er til húsa.  Ekki er þó gert ráð fyrir að skerða þurfi þjónustu vegna þessa eins og er.

Eftir að grunur vaknaði um rakaskemmdir, og vegna einkenna starfsfólks, var verkfræðistofan Efla fengin til að taka sýni og niðurstöður sýndu vöxt myglusveppa í hluta þeirra sýna sem tekin voru í hluta húsnæðisins, skv. upplýsingum sem akureyri.net aflaði sér hjá SAk.

Aðallega er um að ræða rými starfsfólks, skrifstofur, fundaherbergi og geymslur, en einnig í rýmum sem nýtt voru í þjónustu við skjólstæðinga í stuttan tíma í einu. Óskað hefur eftir frekari sýnatöku og reiknað með að af henni verði í næstu viku.

Ekki er gert ráð fyrir að skerða þurfi þjónustu í bráð, sem fyrr segir, en áfram verður unnið að greiningu á stöðunni sem og áætlun til úrbóta.