Ólína Einarsdóttir nýr taugalæknir á SAk

Ólína Einarsdóttir hefur hafið störf sem sérfræðingur í taugalækningum við Sjúkrahúsið á Akureyri (SAk). Hún kemur til SAk eftir rúmlega tveggja ára starf sem sérfræðingur í taugalækningum í Helsingborg í Svíþjóð.

Í frétt á vefsíðu SAk kemur fram að Ólína hafi lokið læknanámi frá Háskólanum í Debrecen í Ungverjalandi. Á námsárunum starfaði hún á Sjúkrahúsinu á Akureyri og eftir útskrift einnig á heilsugæslunni á Dalvík og á Hlíð. Hún flutti síðar til Svíþjóðar þar sem hún hóf sérnám í taugalækningum í Helsingborg. Frá ársbyrjun 2024 hefur hún starfað þar sem sérfræðingur, bæði við deildarstörf og á göngudeild.

Ólína hefur sérstakan áhuga á MS-sjúkdómnum og tók meðal annars þátt í uppbyggingu MS-teymis og göngudeildar í Helsingborg árið 2023.

„Það er spennandi að fá tækifæri til að byggja upp taugagöngudeild og efla taugalækningaþjónustu á Norðurlandi,“ segir Ólína í fréttinni á vef SAk. Hún segist einnig hlakka til samstarfsins við starfsfólk sjúkrahússins og að taka þátt í uppbyggingu þjónustunnar til framtíðar.