KA vann á útivelli og knúði fram oddaleik

Karlalið KA í blaki sigraði Aftureldingu 3:2 í Mosfellsbæ í kvöld, þriðjudagskvöld, í hörkuleik og knúði þar með fram oddaleik um sæti í úrslitum Íslandsmótsins. Afturelding vann þegar liðin mættust í KA-heimilinu í síðustu viku þannig að í kvöld var að duga eða drepast fyrir KA-strákana því það lið sem fyrr sigrar í tveimur leikjum fer lokaúrslitin.

KA vann fyrstu hrinuna 25:21 og næstu 25:19 áður en heimamenn sneru blaðinu og unnu tvær í röð, 25:17 og 25:18. KA-menn bitu hins vegar í skjaldarrendur og unnu fimmtu lotuna 15:10 og liðin mætast því þriðja og síðasta sinni í KA-heimilinu á föstudagskvöldið kemur.

Þróttur í Reykjavík leikur til úrslita í ár; Þróttarar unnu lið Hamars 3:2 í Hveragerði í síðustu viku og fögnuðu aftur sigri, 3:0 (25:18, 25:18, 25:23) í Laugardalshöllinni í kvöld.