KA-Fram í Bestu í dag, bílar, golf og hjólreiðar

KA á heimaleik í Bestu deild karla í dag, en að öðru leyti einkennist vikan fram undan ekki af knattspyrnuleikjum. Seinni hluta vikunnar stendur Bílaklúbbur Akureyrar fyrir hinum árlegu Bíladögum. Hjólreiðafólk verður einnig í sviðsljósinu um komandi helgi, Íslandsmeistaramót í þremur greinum á Akureyri og í Eyjafirði á dagskránni. Þá verður hið árlega miðnæturgolfmót Arcit Open einnig á dagskrá, en keppni hefst á fimmtudag. Fótboltinn tekur svo aftur við síðdegis á sunnudag, 21. júní, en þá eiga karlaliðin á Akureyri bæði útileik.

MÁNUDAGUR 15. JÚNÍ - fótbolti

KA tekur á móti Fram í 10. umferð Bestu deildar karla í dag, mánudag. Að loknum níu umferðum er KA í 8. sæti deildarinnar með tíu stig, en Fram er í toppbaráttunni, situr í 3. sætinu með 20 stig. Fyrir landsleikjahléið mátti KA þola 5-3 tap fyrir KR á útivelli, en Fram vann Breiðablik 4-3. Markaleikir hjá báðum liðum og spurning hverju áhorfendur mega eiga von á þegar liðin mætast í dag.

• Besta deild karla í knattspyrnu, 10. umferð
  KA-völlur (Greifavöllurinn sunnan við KA-heimilið – gervigras) kl. 18
  KA - Fram

KA vann allar viðureignirnar þessara liða í deildinni í fyrra, fyrst 2-1 þegar liðin mættust á heimavelli Fram í lok maí í fyrra og svo 2-0 á Akureyri í ágúst. Þriðji leikur þessara liða var svo í keppni neðri hlutans þar sem KA vann 4-1 á útivelli í lokaumferðinni. Þar með er ekki öll sagan sögð því KA og Fram mættust einnig í 16 liða úrslitum bikarkeppninnar og þar hafði Fram betur, 4-2, í leik sem fram fór á Akureyri.

MIÐVIKUDAGUR TIL LAUGARDAGS, 17.-20. JÚNÍ - Bíladagar

Bílaklúbbur Akureyrar stendur fyrir hinum árlegu Bíladögum, sem að þessu sinni hefjast miðvikudaginn 17. júní og standa fram á laugardaginn 20. júní.

Helstu dagskrárliðir:

• 17. júní
  Bílasýning í Boganum kl. 10-18
  Audio og AF bílagræjur við Bogann kl. 14-16
  Auto-x kl. 20:00–22:00
• 18. júní
  Driftkeppni kl. 10-17
  Vegasalt kl. 20 og bílalimbó kl. 21
• 19. júní
  Sandspyrna kl. 11:00-15:45
  Hávaðakeppni kl. 21
• 20. júní
  Götuspyrna kl. 12:30-19:00
  „Burn out“ kl. 20:30
• Dagskrá og upplýsingar um Bíladaga má finna á vef Bílaklúbbs Akureyrar og Facebook-síðu Bíladaga.

Siðareglur Bíladaga:

• Við göngum og keyrum vel um bæinn okkar, jafnt gestir sem heimamenn.
• Virðum hámarkshraða í íbúðarhverfum sem og á vegum úti.
• Við spólum einungis á akstursíþróttasvæði Bílaklúbbs Akureyrar.
• Gestir Bíladaga eru jákvæðir og þar af leiðandi þrælskemmtilegir.
• Við berum virðingu fyrir náunganum og gerum Bíladaga frábæra.
• Gestir Bíladaga ganga snyrtilega um umhverfi sitt.

FIMMTUDAGUR TIL LAUGARDAGS, 18.-20. JÚNÍ - Arctic Open golfmótið

Hið árlega alþjóðlega golfmót Arctic Open hefst á fimmtudag og stendur fram á laugardag. Þar er keppt í opnum flokki, með og án forgjafar, en mótið er þekkt og vinsælt fyrir miðnæturgolf. Spilaðar eru 18 holur hvorn keppnisdag, 18. og 19. júní, en mótinu lýkur með lokahófi á laugardag. Mótið hefur verið haldið árlega frá árinu 1986, fyrstu 16 árin aðeins í karlaflokki, en í kvennaflokki einnig frá 2002. Upplýsingar um mótið má finna á mótssíðunni á vef Golfklúbbs Akureyrar.

• 18. júní
  Opnunarhátið, setning Arctic Open kl. 10:30
  Fyrsti rástími kl. 11
• 19. júní
  Ræst út kl. 10
• 20. júní
  Lokahóf Arctic Open kl. 19. 

FÖSTUDAGUR TIL SUNNUDAGS, 19.-21. JÚNÍ - Íslandsmeistaramót í þremur greinum hjólreiða

Upplýsingar um hjólreiðaviðburðina má finna á vef Hjólreiðasambands Íslands og á Facebook-síðu Hjólreiðafélagsins.

• Hjólreiðasamband Íslands
• Íslandsmeistaramót í tímaþraut 
• Íslandsmeistaramót í götuhjólreiðum
• Íslandsmeistaramót í criterium

FÖSTUDAGUR 19. JÚNÍ - hjólreiðar

Íslandsmeistaramót í tímatöku í hjólreiðum fer fram í Eyjafjarðarsveit á föstudag og er rásmark og endamark við Botnsreit. Hjólað er um 1,5 kílómetra í suðurátt, inn fjörðinn frá Hrafnagili. Ræsing og endamark í öllum flokkum er á sama stað, en mismunandi snúningspunktar eftir flokkum. Leiðina má finna á Strava - sjá hér.

Vegalengdir eru 15, 20 og 28 kílómetrar. Keppni hefst kl. 18.

LAUGARDAGUR 20. JÚNÍ - hjólreiðar

Íslandsmeistaramótið í götuhjólreiðum fer fram í Svarfaðardal á laugardag. Ræsing er við Víkurröst á Dalvík og fylgja keppendur rásbíl þaðan inn á hringinn sunnan megin í Svarfaðardal. Þaðan er hjólað réttsælis um hringinn. Skipuleggjandi mótsins er Hjólreiðafélag Akureyrar. Keppni hefst kl. 10.

• Elite-flokkur karla - sex hringir - 140,4 km
• Elite-flokkur kvenna - fjórir hringir - 117 km
• U19 flokkur karla - fjórir hringir - 93 km
• U19 flokkur kvenna - þrír hringir - 70 km

SUNNUDAGUR 21. JÚNÍ - hjólreiðar

Götuhjólreiðahelgi Hjólreiðafélags Akureyrar lýkur með Criterium-keppni á um tveggja kílómetra löngum hring á Akureyri. Criterium-keppni fer þannig fram að brautin er hjóluð í fyrirfram ákveðinn tíma, en þegar tíminn er liðinn hjóla allir keppendur einn hring til viðbótar, svokallaðan bjölluhring. 

• Íslandsmeistaramót í Criterium kl. 10

Ræst er í U-flokkum kl. 10, A- og B-flokkum kvenna kl. 11 og A-flokki karla kl. 12. Í kvenna- og karlaflokki er hjólað í klukkutíma, auk bjölluhrings, en í 45 mínútur í U-flokkunum. Hjólað er um Goðanes og Baldursnes. Hringurinn er 2,17 kílómetrar. 

SUNNUDAGUR 21. JÚNÍ - fótbolti

Bæði karlalið Akureyrar í knattspyrnunni eiga leik sunnudaginn 21. júní. Þór sækir FH heim á Kaplakrikavöll í Hafnarfirði og KA sækir Breiðablik heim á Kópavogsvöll. Tveir leikir gegn liðum á suðvesturhorninu, tveimur af örfáum liðum á landinu sem ekki hafa selt nafnið á sínum heimavelli.

Leikir dagsins eru liður í 11. umferð mótsins, þeirri síðustu í fyrri hluta hinnar hefðbundnu deildarkeppni.

• Besta deild karla í knattspyrnu, 11. umferð
  Kaplakrikavöllur í Hafnarfirði kl. 18
  FH - Þór
• Besta deild karla í knattspyrnu, 11. umferð
  Kópavogsöllur kl. 18
  Breiðablik - KA