Fleiri sprautur á loft en nokkru sinni

Rúmlega 1.000 manns verða bólusettir með efni frá Pfizer gegn Covid-19 á slökkvistöðinni á Akureyri í dag, fleiri en áður á einum degi. Flestir sem áttu að mæta í dag eru með einhvers konar undirliggjandi áhættuþætti og fá af þeim sökum ekki bóluefni frá AstraZeneca. Það verður hins vegar í sprautunum sem fara á loft á sama stað á fimmtudaginn og þá verða heldur fleiri boðaðir til bólusetningar. Innanbæjarmetið - sem var rúmlega 700 bólusetningar á einum og sama deginum - verður því tvíbætt í vikunni.

Skipulagið er til fyrirmyndar enda gengur allt eins og í sögu; fólk skráir sig inn, fær sér sæti og þiggur stungu og þennan eftirsótta glaðning í vöðva og situr sem fastast í nokkrar mínútur, þar til gefið er merki. Þá er gengið inn í næsta sal og sest á ný, haukfránir slökkviliðsmenn fylgjast vel með því hvort nokkrum hafi orðið meint af og þaðan er hópnum svo hleypt út í vorið á ný eftir um það bil fimmtán mínútur. Allir sluppu út glaðir og reifir á meðan Akureyri.net staldraði við á stungustöðinni eftir hádegi.