Ferðir ferliþjónustu með hjólastóla falla niður

Strætisvagnar Akureyrar og Akureyrarbær hafa tilkynnt um röskun á ferliþjónustu vegna yfirvofandi óveðurs í dag. Fram kemur í tilkynningu á vef Akureyrarbæjar að allar ferðir ferliþjónustu með hjólastóla falli niður í dag vegna stormsins sem von er á hér á svæðinu um og upp úr hádegi. 

„Þessar ráðstafanir eru gerðar vegna þess að mjög hættulegt getur verið að nota hjólastólalyftur í miklum vindi þegar ekki verður ráðið við hurðir á ferlibílunum og annað sem skapað getur talsverða hættu fyrir alla sem nærri koma,“ segir meðal annars í tilkynningunni.

Notendur geta fengið frekari upplýsingar eða sent fyrirspurnir um ferðirnar með tölvupósti í ferlithjonusta@akureyri.is.